काठमाण्डु – नेपाली कांग्रेसका महामन्त्री विश्वप्रकाश शर्माले बेल्ट एण्ड रोड (बीआरआई) को ऋण स्वीकार्न नसकिने बताएका छन् ।

सिरहाको लहानमा शनिबार कांग्रेस नगर समितिले आयोजना गरेको कार्यकर्ता भेटघाटका क्रममा उनले छिमेकी चीन, भारतसहित विश्वका जुनसुकै देशको सहयोग स्वीकार गरिने तर मुलुकले ऋणको भार थेग्न नसक्ने भएकाले ऋणको रूपमा नलिइने बताए ।

‘अब हामी धेरै ऋण बोक्न सक्दैनौं । श्रीलंकाले ऋणमा बनाएको हम्बनटोटा बन्दरगाहकै नियति भोग्नुपर्नेतर्फ सजग हुनुपर्छ,’ उनले भने, ‘ऋण सहयोगमा बनाइएको पोखरा अन्तर्राष्ट्रिय विमानस्थल जरुरी थिएन । १२ मिनेट हवाई यात्राको दूरीमा भैरहवामा अन्तर्राष्ट्रिय विमानस्थल बनाइएकै थियो, बरु पोखराको अन्तर्राष्ट्रिय विमानस्थल मधेशमा बनाइनुपथ्र्यो ।’

प्रधानमन्त्री केपी शर्मा ओलीले चीन भ्रमण जानुअघि सत्तारुढ कांग्रेससँग बीआरआईबारे छलफल गरे पनि कांग्रेसले ऋण लिन अस्वीकार गर्दै आएको छ ।