काठमाण्डु- नेपाल विद्युत प्राधिकरणले बिजुलीको लाइन काटिदिएको विरोधमा बाराको सिमरास्थित जगदम्बा स्टिल, त्रिवेणी स्पिनिङ मिल र हुलास स्टिलमा कार्यरत मजदुरले प्रदर्शन गरेका छन्।

मंगलबार बिहान जगदम्बा स्टिल उद्योगका मजदुरबाट विरोध प्रदर्शन सुरु भएको थियो। त्यसपछि त्रिवेणी स्पिनिङ मिल र हुलास स्टिलमा कार्यरत मजदुर पनि सडकमा उत्रिएका हुन्।

जगदम्बा स्टिलमा करिब ३ हजार ५ सय, त्रिवेणी स्पिनिङमा करिब २ हजार ५ सय र हुलास स्टिलमा करिब एक हजार ५ सय मजदुर कार्यरत छन्। आ–आफ्ना कारखानाबाट प्लेकार्डसहित प्रदर्शनमा निस्किएका उनीहरुले नेपाल विद्युत प्राधिकरणको कार्यालय घेराउ गरी जिल्ला प्रशासन कार्यालयलाई ज्ञापनपत्र बुझाउने कार्यक्रम छ।

बिजुली काटिएपछि उद्योग बन्द हुँदा आफूहरुको रोजीरोटी संकटमा परेको भन्दै मजदुरले प्रदर्शन गरेका हुन्। उनीहरुले उद्योग र प्राधिकरणबीचको द्वन्द्वको मारमा आफूहरु परेको गुनासो गरेका छन्।

लोडसेडिङका बेला केही उद्योगले प्रिमियम शुल्क लाग्ने डेडिकेटेड र ट्रंक लाइनबाट बिजुली प्रयोग गरेको भन्दै प्राधिकरणले छुट बिलको पत्र काटेपछि विवाद बढेको हो। खासगरी डेडिकेटेड फिडर र ट्रंक लाइन मार्फत वितरण गरेको विद्युतको महसुल दरको भुक्तानीलाई लिएर प्राधिकरणले कतिपय उद्योगको बिजुलीको लाइन काट्न थालेको हो।

उद्योग व्यवसायीहरुले अर्बौं रुपियाँ कर तिर्ने उद्योगहरुले विद्युत महशुल तिर्दैनन् भनेर प्रचार गरिँदा आफूहरुलाई निकै दुःख लागेको बताउँदै बिना आधार र प्रमाण प्राधिकरणले गरेको कमजोरीको भारी उद्योगीहरुलाई बोकाउन नमिल्ने बताएका छन् ।

टीओडी मिटर हेर्दा आफूहरुले तिर्नुपर्ने देखिए तिर्न तयार रहेको बताउँदा बताउँदै पनि हतार गरेर उद्योगको नाममा बक्यौता देखाउने र प्राधिकरणलाई नाफामा देखाउने काम गरिएको उनीहरको गुनासो छ ।