धनगढी– कैलाली प्रशासनले तिहारमा खेलिने देउसीभैलोलाई मर्यादित बनाउन अपील गरेको छ।

देउसीभैंलोको नाममा रकम तोकेरै लिने गरेको दृष्टान्त समेत रहेका बेला कैलाली प्रशासनले सूचना जारी गर्दै मर्यादित र सभ्य रुपमा प्रस्तुत हुन भनेको हो। यस वर्षको तिहार आगामी कात्तिक ४ गते रहेको छ। प्रशासनले देउसीभैंलो राति १० बजेसम्म मात्र खेल्न आग्रह गरेको छ।

प्रशासनले तिहार तथा छठ पर्वको अवसरमा भूइचम्पा, पटाका, आतिशबाजी जस्ता विष्फोटक पदार्थको उत्पादन, आयात, निर्यात, बिक्री वितरण र प्रयोगमा रोक लगाएको छ ।

पटाका, आतिशबाजी जस्ता विष्फोटक पदार्थको प्रयोगले सर्वसाधारण जनताको स्वास्थ्यमा प्रतिकूल असर पर्न सक्ने भएकाले यस्ता पदार्थको बिक्री वितरण र प्रयोग नगर्न प्रशासनले आग्रह गरेको छ। यदि यसो गरिएको पाइए कारबाही हुने चेतावनी पनि कार्यालयले दिएको छ।