काठमाण्डु – मुगु,नवलपरासी (पूर्व) र नवलपरासी (पश्चिम)मा छुट्टाछुट्टै सवारी दुर्घटनामा परी ३ जनाको मृत्यु भएको छ ।

मुगु, छाँयानाथ रारा नगरपालिका-६ गोब्रेघाटस्थित सडकमा भे.१ त ६५६९ नम्बरको ट्रयाक्टरको ट्रलीबाट खसेर सोही नगरपालिका-७ पिना बस्ने ४८ वर्षीय पुन्य बहादुर बमको सोमबार दिउँसो घटनास्थलमै मृत्यु भएको छ । ट्रयाक्टर चालकलाई प्रहरीले नियन्त्रणमा लिएको छ ।

नवलपरासी (पूर्व) गैंडाकोट नगरपालिका-८ बिजय चोकस्थित सडकमा ना.४० प ५३५५ नम्बरको मोटरसाइकल सोमबार दिउँसो दुर्घटना हुँदा मोटरसाइकल चालक सोही स्थान बस्ने २४ बर्षीय शनी रानाको मृत्यु भएको छ । दुर्घटनामा गम्भीर घाइते भएका उनको नयाँ मेडिकल कलेज भरतपुर चितवनमा उपचारको क्रममा मृत्यु भएको हो ।

नवलपरासी (पश्चिम), बर्दघाट नगरपालिका-४ थाना चोकमा से.१ च २२३३ नम्बरको स्कार्पियो गाडीको ठक्करबाट बाटो काट्दै गरेका पैदलयात्री सोही ठाउँ बस्ने बारा कलैया घर भएका ५ बर्षीय समिर मियाँको सोमबार दिउँसो मृत्यु भएको छ । ठक्करबाट गम्भीर घाइते भएका उनको क्रिमसन अस्पताल मणिग्राम रुपन्देहीमा उपचारको क्रममा मृत्यु भएको हो ।

साथै सोही गाडीले लु.३९ प १८९३ नम्बरको स्कुटरलाई समेत ठक्कर दिँदा घाइते भएका स्कुटर चालकको स्थानीय संजिवनी मेडिकलमा उपचार भइरहेको छ भने स्कार्पियोमा सवार ८ जना सकुशल रहेका छन् । स्कार्पियो चालकलाई प्रहरीले नियन्त्रणमा लिएको छ । दुर्घटनाका सम्बन्धमा स्थानीय प्रहरीले आवश्यक अनुसन्धान गरिरहेको छ ।