काठमाण्डु– राष्ट्रिय फुटबल टोलीका गोलकिपर किरण चेम्जोङले ‘प्लेअर अफ दि मन्थ अवार्ड’ जित्न सफल भएका छन् ।

राउण्ड ग्लास पञ्जाव एफसीबाट आई लिग खेलिरहेका किरणले ‘प्लेअर अफ दि मन्थ’को अवार्ड जितेका हुन् । साथै  उनी टिम अफ दि मन्थमा पनि पर्न सफल भएका छन् ।

भारतमा भइरहेको आई लिगमा किरणले पञ्जावका लागि उत्कृष्ट प्रदर्शन गरिरहेका छन् । पहिलो चरणको लिगमा १० खेल खेल्दा उनले ६ खेलमा क्लिनसिट राखेका थिए । यस्तै उनले नियमित कप्तान विक्रमजित सिंहको अनुपस्थितिमा केही खेलमा कप्तानीसमेत गरेका थिए ।

किरणले प्लेअर अफ दि मन्थ अवार्ड पाएपछि आफ्नो करियरमा यो अर्को महत्वपूर्ण उपलब्धि भएको बताएका छन् । उनले यसका लागि टिमको सबै सदस्यको योगदान रहेको भन्दै सबैलाई धन्यवाद दिएका छन् ।