काठमाडौं- एकता संयोजन समितिको बैठकको निर्णयलाई अनुमोदन गर्दै माओवादी केन्द्रको बैठक केन्द्रीय कार्यालयको विस्तारित बैठक सकिएको छ। पार्टी अध्यक्ष पुष्पकमल दाहाल ‘प्रचण्ड’को निवास खुमलटारमा बसेको बैठकले पार्टी एकता संयोजन समितिको बैठकको निर्णयलाई अनुमोदन गरेको छ।

एमाले र माओवादीबीच एकतालाई अन्तिम रुप दिन आज बिहान संयोजन समितिको बैठक बसेको थियो। बैठक सकिएसँगै खुमलटारबाट नेताहरु दुवै दलको संयुक्त बैठकका लागि बालुवाटारतर्फ प्रस्थान गरेका छन्। उता बालुवाटारमा पनि नेकपा एमालेकाे बैठक जारी छ ।

दुवै पार्टीले एकता संयोजन समितिको निर्णयलाई अनुमोदन गरेपछि पार्टी विघटन भएको घोषणा गरिनेछ। आजै साँझ राष्ट्रिय सभागृहमा पत्रकार सम्मेलन गरी पार्टी एकताको घोषणा हुनेछ।