काठमाण्डु- आईसीसी विश्वकप लिग–२ त्रिकोणात्मक ओडिआई सिरिजमा पपुवा न्युगिनीले नेपाललाई १७४ रनको मध्यम लक्ष्य दिएको छ । यूएईको दुबई क्रिकेट रंगशालामा टस हारेर पहिला ब्याटिङ थालेको पपुवा न्युगिनीले ५० ओभरमा ८ विकेट गुमाउँदै १७३ रन बनाएको हो ।

पपुवा न्युगिनीका लागि कप्तान असद वालाले सर्वाधिक ४५ रनको योगदान गरे । ओपनरद्वय टोनी उरा र लेगा सियाकाले क्रमश: ६ र २० रनको योगदान गरे । चार्ल्स अमिनीले १३, रिले हेकुरेले १, सेसे बाउले १९, नर्मन भानुआले १८, साइमन अताईले २, चाड सोपरले २२, काबुआ मोरियाले १७ रन बनाए ।

नेपालका लागि कप्तान सन्दिप लामिछाने र सोमपाल कामीले दुई/दुई विकेट लिएका छन् । करन केसी, आरिफ शेख, दीपेन्द्रसिंह ऐरी र पवन सरार्फले समान एक/एक विकेट लिएका छन् ।