काठमाण्डु – काठमाण्डुको बालाजुमा भीषण आगलागी भएको छ । काठमाण्डुको तारकेश्वर नगरपालिकास्थित सानोपुल नजिकै लोलाङ हाइटको एक घरमा आगलागी भएको हाे ।

साँझ ७ बजे आगलागी भएपछि प्रहरीको टोली काठमाण्डु महानगरपालिकाको दमकलसहित आगो निभाउन पुगेका थिए । आगो निभाउन काठमाण्डु महानगरपालिकाको जुद्ध बारुण यन्त्र, नेपाली सेनाको अग्नि नियन्त्रक टोली साथै विभिन्न निकायको दमकल प्रयोग गरिएको थियो ।

प्रत्यक्षदर्शीका अनुसार लक्ष्मी पुजाको आगो सल्केको हुनसक्ने आशंका गरिए पनि आगलागीको कारण भने खुल्न सकेको छैन । आगलागी भएको घरमा जुत्ता कारखानाका साथै रेष्टुरेन्ट र मोटरसाइकल वर्कसप पनि रहेको प्रहरीले जनाएको छ । आगो पूर्णरुपमा नियन्त्रणमा आएपनि यकिन क्षतीको भने जानकारी आउन बाँकी छ ।