काठमाण्डु – कीर्तिपुरमा जारी प्रथम अन्तरविद्यालय सशस्त्र प्रहरी महानिरीक्षक रनिङ ट्रफी फूटबल प्रतियोगितामा आयोजक नेपाल एपीएफ स्कूल र नेपाल पुलिस स्कूल फाइनलमा पुगेका छन् ।

आज शनिबार सम्पन्न प्रतियोगिताको पहिलो सेमिफाइनल खेलमा नेपाल एपीएफ स्कूल कीर्तिपुर ‘क’ टीम मनकामना सेकेण्डरी स्कूल जोरपाटीलाई ४–० गोल अन्तरले पराजित गर्दै उपाधि नजिक पुगेको छ ।

नेपाल एपीएफ स्कूलको तर्फबाट विकास बोहोराले २ तथा तेन्जिङ शेर्पा र रोहित गोलेले समान १–१ गोल गरेका छन् । विकास बोहोरा ‘म्यान अफ द म्याच’ भएका छन् ।

शनिबार नै सम्पन्न दोस्रो सेमिफाइनल खेलमा नेपाल पुलिस स्कूल साँगाले सैनिक आवासीय महाविद्यालय सल्लाघारीलाई ट्राइबेकरमा ३–२ गोल अन्तरले पराजित गरी फाइनलमा प्रवेश गरेको छ । खेलमा दिप्सन परियार उत्कृष्ठ खेलाडी चुनिएका छन् ।

प्रतियोगिताको फाइनल खेल सोमबार मध्याह्न १२ बजे हुने जनाइएको छ ।

प्रतियोगिताको उपाधि विजेताले ५० हजार नगद पुरस्कार पाउनेछ । प्रतियोगितामा काठमाण्डु उपत्यकाका १७ र काभ्रे जिल्लाबाट १ गरी कूल १८ वटा विद्यालयका १९ टीमको सहभागिता थियो ।