काठमाण्डु – नेपाली कांग्रेसको जारी महासमिति बैठकमा केन्द्रीय सदस्य अर्जुननरसिंह केसीले १ हजार र ५०० दरका नोटमाथि प्रतिबन्ध लगाउनुपर्ने प्रस्ताव गरेका छन् ।

बैठकमा उनले मुलुकको मुद्रालाई कालोधनको माध्यम बन्न नदिन विमुद्रीकरण गर्नुपर्ने आवश्यकता रहेको बताए ।

उनले भने, ‘राजनीतिमा लागेका हामीजस्ता व्यक्तिहरूले बोराका बोरा पैसा लुकाएर राखेका छन्, कोठाभरि पैसाको गोदाम नै बनाएका छन् भन्ने जनतामा भ्रमपूर्ण सन्देश पुर्‍याइएको छ । माफिया, विचौलिया, कालोधनका धनपतिहरूले सत्तामा पकड जमाएका छन् भन्ने आमविश्वास छ । देशको मुद्रालाई कालोधनको माध्यम बन्न नदिन विमुद्रीकरण गर्नुपर्ने आवश्यकता छ । त्यसैले १ हजार र ५०० दरका नोटमा प्रतिबन्ध लगाउनेसम्मको कदम चलाउन सरकार तयार हुनुपर्छ र कांग्रेसले नै यसको नेतृत्व लिने आँट गर्नुपर्छ ।’

वित्तीय अराजकता र अनुशासनहीनता पराकाष्ठामा पुगेको उनले बताए । ‘भ्रष्टाचार विरोधी नारा भाषणमा मात्र सीमित छ । तसर्थ सम्पूर्ण चर्चित भ्रष्टाचारका काण्डहरूको छानबिनको लागि पूर्व प्रधानन्यायाधीशको संयोजकत्वमा देशले भरोसा गर्नसक्ने व्यक्तिहरूको शक्तिसम्पन्न न्यायिक आयोग गठनको प्रतिबद्धता गर्नुपर्दछ । यो प्रस्ताव मैले धेरैपटक पार्टीको केन्द्रीय समितिको बैठकमा पनि प्रस्तुत गरेको छु,’ उनले भने ।