काठमाण्डु – फिल्म ‘पूर्ण बहादुरको सारङ्गी’मा नायिका अञ्जना बराइली अनुबन्धित भएकी छन् ।

सेभेन सिज सिनेमाको प्रस्तुतिमा बन्न लागेको फिल्ममा कलाकारहरूको लाइन अप पूर्ण हुने क्रममा छ ।

निर्माण पक्षले फिल्मका लागि मुख्य भूमिकामा यसअघि गायक तथा कलाकार प्रकाश सपूत र मुकुन भुसाल अनुबन्धित गराएको थियो ।

प्रकाश र मुकुनपछि अभिनयका कारण चिनिँदै आएका कलाकार विनोद न्यौपाने, कलाकार भोला राज सापकोटा र देशभक्त खनाललाई निर्माण पक्षले अनुबन्धित गराएको थियो ।

फिल्ममा उनीहरूको भूमिकाबारे अहिले केही पनि खुलाइएको छैन । अहिलेसम्म अनुबन्धित भएका सबै कलाकारहरूलाई शीर्ष भूमिका देख्न सकिने निर्माता विनोद पौडेलले बताए ।

जेठ २१ गतेबाट छायांकनमा जाने तयारी रहेको यस फिल्मलाई अन्तर्राष्ट्रिय रूपमा फिल्म वितरण गर्दै आएको कम्पनी सेभेन सिज इन्टरटेनमेन्टले निर्माण गर्न लागेको छ ।

सरोज पौडेलको लेखक तथा निर्देशक रहेर सोसल–ड्रामा बन्ने फिल्मका मौलिक कथाको एक गहन विषयलाई उठान गर्न लागेको बताइएको छ ।

अभिनेता र अन्य कलाकारहरू फाइनल भए पनि निर्माण पक्षले अभिनेत्री र अन्य कलाकारका बारेमा गोप्य राख्न चाहेका छन् ।

फिल्ममा विनोद पौडेल र प्याट्रिक सुवेदीको लगानी रहनेछ । रमेश चौलागाईं र हरि श्रेष्ठ फिल्मका कार्यकारी निर्माता हुन् । महेश दवाडीको पटकथा तथा संवाद रहन फिल्ममा प्रशान्त सिवाकोटीको संगीत रहने छ ।

फल्मको प्रदर्शन मिति आउँदो वर्षलाई तोकिएको छ । निर्माण टीमले फिल्मलाई विक्रम संवत् २०८२ सालभित्र विश्व बजारमा प्रदर्शन गर्ने लक्ष्य राखेको जनाइएको छ ।