नेपालगञ्ज – बाँकेको नेपालगञ्ज उपमहानगरपालिका–२० राँझास्थित नेपालगञ्ज विमानस्थलबाट स्रोत नखुलेको २४ लाखसहित ५ भारतीय नागरिक पक्राउ परेका छन् ।

विमानमार्फत काठमाण्डु जान लागेका भारतीय नागरिक प्रकाशनारायण गुप्तासहितका ५ जनाको टोलीबाट रकम बरामद भएको जिल्ला प्रहरी कार्यालय बाँकेका प्रहरी नायब उपरीक्षक नारायण डाँगीले जानकारी दिए ।

उनका अनुसार भारतको सीतापुर जिल्ला कोतवालीका ४३ वर्षीय अजय मिश्रा, ४५ वर्षीय आशीष गुप्ता, ३९ वर्षीय पङ्कज जैसवाल र ४६ वर्षीय बीमल गुप्ता पक्राउ परेका छन् । उनीहरूलाई जिल्ला अदालत बाँकेबाट ४ दिनको म्याद थप गरी हुण्डी कारोबार सम्बन्धी कसूरमा अनुसन्धान भइरहेको प्रहरी नायव उपरीक्षक डाँगीले बताए ।