काठमाण्डु – नेपाल उद्योग वाणिज्य महासंघका अध्यक्ष चन्द्रप्रसाद ढकालले अर्थतन्त्रमा बिस्तारै सुधार देखिँदा समग्र बजार चलायमान हुन थालेकाले अवसर सदुपयोग गर्न आग्रह गरेका छन् ।

महासंघले बिहीबार काठमाण्डुमा आयोजना गरेको अन्तर्क्रिया कार्यक्रममा बोल्दै अध्यक्ष ढकालले सरकारले स्थायित्व दिने विश्वासमा अर्थतन्त्रमा सुधारका स्पष्ट संकेत देखिएका बताए ।

बजारमा देखिएको सुधारलाई ध्यान दिएर स्वदेशी एवं विदेशी लगानीकर्ताहरूलाई आकर्षित गर्न सरकार र निजी क्षेत्रबीच थप सहकार्यका लागि अध्यक्ष ढकालले आग्रह गरे ।

देशभित्र शेयर बजारमा उत्साह छ भने घरजग्गा कारोबार पनि बिस्तारै बढ्न थालेको र कर्जाको मागमा पनि सुधार भइरहेकाले यसलाई अझै चलायमान बनाउन आवश्यक रहेको उनले बताए । पर्यटक आगमन बढिरहेको, रेमिट्यान्स हालसम्मकै उच्च देखिएको, विदेशी मुद्राको सञ्चिति पर्याप्त हुँदा भुक्तानी सन्तुलन सहज अवस्थामा भएकाले लगानीकर्तालाई विश्वासमा लिई काम गर्न सहज वातावरण रहेको पनि अध्यक्ष ढकालले बताए ।

थप पर्यटक आकर्षित गर्न पोखरा तथा भैरहवाका २ अन्तर्राष्ट्रिय विमानस्थल सञ्चालनमा ल्याउन भइरहेका पहलको स्वागत गर्दै उनले स्वदेशी र विदेशी पर्यटकलाई लाग्ने शुल्कको अन्तर हटाउन तथा हवाई यात्रा सुलभ र सस्तो बनाउन पहल लिने समय आएको उनले बताए ।

उनले भने, ‘प्रधानमन्त्रीज्यूको निकट भविष्यमा हुने थाइल्यान्ड भ्रमणका क्रममा नेपाल–थाइल्यान्ड बिजनेश फोरम आयोजना गरी विदेशी लगानी भित्र्याउने पहलमा साथ दिन महासंघले हरतरहले काम गरिरहेको छ ।’

यसअघि महासंघले भारतमा २ पटक र चीन तथा दुबईमा यस्तै ४ वटा लगानी प्रवद्र्धन कार्यक्रम आयोजना गरिसकेको छ । लगानीकर्ताहरूको मागबमोजिम महासंघले स्थापना गरेको विदेशी लगानी सहायता कक्षले लगानीकर्ताहरूलाई सहयोग पुर्‍याइरहेकोे उनले बताए ।

सो अवसरमा आर्थिक सुधारका लागि आयोग बनाउने विषयलाई कार्ययोजनामा समेटिएको भन्दै अध्यक्ष ढकालले अर्थमन्त्रीलाई धन्यवाद दिए । यस्तो आयोगले निजी क्षेत्र सरकारका सरोकारवाला निकायबीच समन्वयको काम गर्ने र समस्या समाधानको पहल गर्ने विश्वासमा महासंघले आर्थिक सुधार आयोगको प्रस्ताव गर्दै आएको पनि अध्यक्ष ढकालले बताए ।

अध्यक्ष ढकालले कम्तीमा १० वर्ष उत्पादनमूलक क्षेत्रका लागि ल्याइएको सहुलियतमा परिवर्तनलाई नगर्न पनि आग्रह गरे । उद्योग व्यवसायले खपत गर्ने विद्युतलाई कच्चा पदार्थको रूपमा सुलभ दरमा उपलब्ध गराउन र ह्वीलिङ चार्ज तिरेर सिधै बिजुली किन्ने व्यवस्था गरिनुपर्ने उनले बताए ।

सानो लगानी भएका तर ठाउँ नपाएका साना लगानीकर्ताहरूलाई समेटेर महासंघको पहलमा नेपाल डेभलेपमेन्ट कम्पनी स्थापना भएको जानकारी गराउँदै उनले यसबाट स्टार्ट अप, जलविद्युत् लगायतका पूर्वाधार एवं सार्वजनिक संस्थानहरूको क्षमता विस्तारमा लगानी गर्ने योजना रहेको बताए ।

निजी क्षेत्रलाई हेर्ने करीब डेढ दर्जन नियामक निकाय भएकाले अख्तियारको कार्यक्षेत्रभित्र तान्नुपर्ने अवस्था नरहेकाले निजी क्षेत्रलाई निरुत्साहित बनाउने गरी कानून निर्माण गर्न नहुनेतर्फ पनि उनले बताए ।

निजी क्षेत्र मैत्री कानूनी व्यवस्था र नीति निर्माण तहमा निजी क्षेत्रको सहभागिताले नै आर्थिक समृद्धि हासिल हुने भएकाले राजनीतिक तथा सरोकारवालाहरूले यसमा ध्यान दिने विश्वास पनि अध्यक्ष ढकालले व्यक्त गरेका छन् ।