काठमाण्डु-प्रधानमन्त्री केपी शर्मा ओलीले नेपाली कांग्रेसका सभापति एवं पूर्व प्रधानमन्त्री शेरबहादुर देउवालाई जन्मदिनको उपलक्ष्यमा शुभकामना दिएका छन् । प्रधानमन्त्री ओलीले बालुवाटारमै बोलाएर देउवाको जन्मदिन मनाइदिएका हुन् । देउवाको जन्मदिनको अवसरमा ओलीले सुस्वास्थ्य, दीर्घायु र प्रगतिको कामना कामना गरेका छन् ।

माओवादी केन्द्रका अध्यक्षसहितको बैठकका लागि आज प्रधानमन्त्री निवास बालुवाटार पुगेका सभापति देउवालाई प्रधानमन्त्री ओलीले दोसल्ला ओढाएर जन्मदिनको शुभकामना दिएका हुन् । जसको तस्बिर ओली आफैले सामाजिक सञ्जालमा राखेका छन् ।

‘आज पूर्वप्रधानमन्त्री, मेरा मित्र शेरबहादुर देउवाको जन्मदिन परेको छ । प्रमुख तीन दलका नेताहरूसँग समसामयिक राजनीतिक विषयमा कुरा पनि भयो । आजको भेटमा शेरबहादुरजीलाई जन्मदिनको शुभकामना दिने अवसर मिल्यो । सुस्वास्थ्य, दीर्घायु र प्रगतिको कामना शेरबहादुरजी,’ प्रधानमन्त्री ओलीले जन्मदिनको शुभकामना दिँदै सामाजिक सञ्जालमार्फत भनेका छन् ।