काठमाण्डु-फिल्म ‘खुस्मा’ असोज ३ गते रिलिज हुने भएको छ ।

फिल्मका कलाकारहरू धीरज मगर र उपासनासिंह ठकुरी अहिले प्रचारको दौडधुपमा छन् ।

एम मिडिया प्रालिको ब्यानरमा निर्माण भएको फिल्मको लेखन तथा निर्देशन अशोक थापा मगरले गरेका छन् । उनले यसअघि केही डकुमेन्ट्री सिनेमा लेखन तथा निर्देशन गरेपनि यो नै ठूलो पर्दाको पहिलो निर्देशकीय फिल्म हो ।

फिल्मको निर्मातामा वीरबहादुर लामा, चन्द्र बहादुर भट्टचन, मानबहादुर धनाह मगर र बेतान मगर छन् भने सहनिर्माता सुस्मिता बुढाथोकी हुन् ।

सिनेमा दीपक बज्राचार्यले छायांकन गरेका हुन् । सिनेमाको सार्वजनिक गीत र ट्रेलरले रुचाएका छन् । फिल्मको गीत र ट्रेलर म्युजिक र मुभिज सेक्सनअन्तर्गत ट्रेन्डिङको शीर्ष स्थानमा छन् ।

सिनेमामा धीरज र उपासनाका अलावा माओत्से गुरुङ, खड्कबहादुर पुन (खबपु), सुजाता राई, विजय सुब्बा, राज थापा काउचा, अस्तित्व भट्टचन, संगीता थापा मगर, अरुन मगर, सारा राई, श्वेता मिश्र, विवेश मगरलगायतले अभिनय गरेका छन् ।

मगर समुदायको परिवेशमा निर्माण भएको प्रेमकथामा आधारित सिनेमाले जनयुद्धको प्रभावका बीच अंकुराएको प्रेमलाई समेटेको छ । फिल्मको वितरण गोविन्द शाहीको काफिया फिल्मसले गर्नेछ ।