काठमाण्डु– नेपाल प्रिमियर लिग (एनपीएल)मा खेलाडी अक्सनका लागि दर्ता प्रक्रिया खुला भएको छ ।नेपाल क्रिकेट संघ क्यानले ए बी र सी गरी तीन श्रेणीमा विभाजन गरि दर्ता प्रक्रिया खुला गरेको हो ।

खेलाडीले आफ्नो इच्छाअनुसार कुनै पनि श्रेणीमा आफ्नो नाम दर्ता गराउन सक्ने क्यानले जनाएको छ ।खेलाडी दर्ताका लागि एक हजार शुल्क तोकिएको छ भने खेलाडीले अनलाइन मार्फत नाम दर्ता गर्न सक्नेछन् ।

ए ग्रेडका खेलाडीको न्यूनतम मूल्य १० लाख रुपैयाँ तोकिएको छ । उक्त मूल्य बढीमा १५ लाखसम्म जानेछ । एउटा ए ग्रेडको खेलाडीलाई १५ लाखसम्म एक भन्दा बढी टोलीको बोली लागेको खण्डमा चिट्ठा तानिने छ ।

बी ग्रेडका खेलाडीको न्यूनतम मूल्य ५ लाख राखिएको छ । बी ग्रेडका खेलाडीको उच्चतम मूल्य १० लाख सम्म पाउनेछन् । १० लाख भन्दा बढी भएमा चिट्ठा थुतिनेछ । त्यस्तै सी ग्रेडका खेलाडीको न्यूनतम मूल्य २ लाख राखिएको छ । बढीमा ५ लाखसम्म जानेछ ।

एनपीएल नोभेम्बर ३० देखि डिसेम्बर २१ सम्म काठमाडौंमा हुँदैछ । एनपीएलमा काठमाडौं, पोखरा, चितवन, विराटनगर, जनकपुर, लुम्बिनी, सुदूरपश्चिम र कर्णाली गरी आठ टोली छन् । क्यानले ८ टोलीका मार्की खेलाडी चयन गरीसकेको छ ।