काठमाण्डु – प्रधानमन्त्री केपी शर्मा ओली पूर्वराष्ट्रपति विद्यादेवी भण्डारीलाई भेट्न चपलीमा रहेको भण्डारी निवासमा पुगेका छन् । भण्डारी निवासमा प्रधानमन्त्री ओली र पूर्वराष्ट्रपति भण्डारीबीच करिब एक घण्टादेखि छलफल भइरहेको निकटस्थ स्रोतले जानकारी दियो ।

एमालेका एक नेताले पछिल्लो समयमा विकसित पार्टीको राजनीतिक स्थिति तथा बाढी र पहिरोपछिको अवस्थालाई कसरी समाधान गर्ने भन्नेबारे कुराकानी भइरहेको जानकारी दिए ।

एमालेकी पूर्वउपाध्यक्ष भण्डारी एमालेबाट उम्मेदवार भएर दुई कार्यकाल राष्ट्रपति बनेकी थिइन् । पछिल्लो समय उनी एमाले कार्यक्रममा सहभागी हुँदै आएकी छन् । ओली एमालेका वर्तमान अध्यक्ष हुन् ।

केही नेताहरूले त एमालेको आगामी महाधिवेशनबाट पूर्वराष्ट्रपति भण्डारी पुनः एमालेको राजनीतिमा फर्किने बताइरहेका छन् । भण्डारीले भने यसबारे मुख खोलेकी छैनन् ।