काठमाडौं– नेपाली काँग्रेसको केन्द्रीय समितिको बैठकमा महामन्त्री पूर्ण बहादुर खड्काको संयोजकत्वमा गठित विधान मस्यौदा समितिले क्रियाशील सदस्यको नयाँ व्यवस्था केन्द्रीय समितिमा आफ्नो प्रतिवेदन पेश गरेको छ ।
समितिले कांग्रेस विधानमा २१ वटा मूलभूत विषय संशोधनका लागि प्रस्ताव गरेको छ । विधानमा कांग्रेसको साधारण सदस्यतालाई कांग्रेसको सदस्य र नवीकरण गरेपछि स्वतः क्रियाशील सदस्य रहने व्यवस्था गरिएको छ ।
समितिले तयार पारेको विधान अध्ययनका लागि आइतबारबाट सुरु भएको बैठकमा सवै काँग्रेस केन्द्रीय सदस्यहरुलाई वितरण गरिएको हो । मस्यौदा समितिले मस्यौदा तयार गर्दा विधान मस्यौदाका क्रममा आएका फरक विचारहरुलाई समेत राखेर प्रस्तुत गरेको छ ।
विधान संशोधन मस्यौदामा केही सदस्यले राखेका फरक मत पनि समावेश गरिएको छ । आगामी मंसिर १३ गते बस्ने केन्द्रीय समिति बैठकले मस्यौदा पारित गरी अनुमोदनका लागि महासमिति बैठकमा लैजाने छ । महासमिति बैठक मंसिर २८ देखि पुस ३ गतेसम्म काठमाडौमा गर्ने काँग्रेसको निर्णय छ । प्रस्तावित विधान मस्यौदामा केन्द्रीय सदस्यको संख्या ८५ बाट बढाएर १ सय ४१ पुर्याउने उल्लेख गरिएको छ ।
प्रतिक्रिया