काठमाण्डु – विश्व स्वास्थ्य संगठन (डब्ल्यूएचओ) ले शुक्रबार हिजुबल्लाह विरुद्धको युद्धमा इजरायली आक्रमणले लेबनानका स्वास्थ्यकर्मी र सुविधाहरूमा पारेको प्रभावबारे गहिरो चिन्ता व्यक्त गरेको छ ।

‘हामी लेबनानमा स्वास्थ्यकर्मी र सुविधाहरूमाथि बढ्दै गएको आक्रमणबारे गहिरो चिन्तित छौं, तथ्यांकहरू वास्तवमै अचम्मित पार्ने खालका छन् । यस्ता आक्रमणहरूमा १०२ जनाको मृत्यु भएको छ, ८३ जना घाइते भएका छन्,’ डब्ल्यूएचओकी प्रवक्ता मार्गरेट ह्यारिसले जेनेभामा एक पत्रकार सम्मेलन भनिन् ।

डब्ल्यूएचओले स्वास्थ्य सेवामाथिको आक्रमणको अभिलेख राख्छ तर दोष कसैलाई लगाउँदैन । ‘समग्रमा हामीले ५५ वटा आक्रमणको पुष्टि गरेका छौं तर धेरै कर्मचारी ड्युटी बाहिर हुँदा पनि मारिएका र घाइते भएकाले स्वास्थ्य मन्त्रालयले यो संख्या धेरै बढी रहेको जनाएको छ, स्वास्थ्य प्रणालीहरू पहिले नै धेरै तनावमा भएकाले यो महत्त्वपूर्ण छ,’ ह्यारिसले भनिन्, ‘स्वास्थ्यकर्मीहरू पहिले नै अत्यधिक काम गर्न बाध्य छन् र विस्थापित छन् । त्यसैले हामी स्वास्थ्यकर्मीहरूलाई त्यस्तो समयमा गुमाइरहेका छौं, जतिबेला उनीहरूको सबैभन्दा बढी आवश्यकता छ ।’

‘हामी फेरि, फेरि र फेरि जोड दिइरहेका छौं कि स्वास्थ्य सेवा लक्ष्य होइन; स्वास्थ्यकर्मीहरू लक्ष्य होइनन्,’ उनले भनिन्, ‘स्वास्थ्य प्रणालीमाथि निरन्तर आक्रमणका कारण सबै जना आवश्यक स्वास्थ्य सेवा प्राप्त गर्न संघर्षरत छन् र स्वास्थ्य प्रणाली पहिले नै ठूलो दबाबमा थियो ।’

ह्यारिसले देशको आर्थिक अवस्था र अस्पतालका जेनेरेटर चलाउन इन्धन प्राप्त गर्ने चुनौतीका कारण भएको बताइन् ।

‘लेबनानमा सबैका लागि स्वास्थ्य सेवामा पहुँच एउटा वास्तविक संघर्ष हो तर निश्चय नै जहाँ अस्पतालहरूमा आक्रमण भएका छन्, त्यस्ता क्षेत्रहरूमा यो अझ ठूलो संघर्ष हो,’ उनले भनिन्, ‘अस्पतालहरू घाइतेहरूले भरिएका छन् र प्रणालीले विशाल बोझ बोकिरहेको छ ।’

हमासको समर्थनमा हिजबुल्लाहले गरेको भनिएको करीब १ वर्षको आक्रमण–प्रत्याक्रमणपछि सेप्टेम्बर २३ देखि लेबनानमा लडाइँ बढेपछि एएफपीले स्वास्थ्य मन्त्रालयको तथ्यांकका आधारमा गरेको गणनाअनुसार लेबनानमा कम्तीमा १ हजार ८२९ जनाको मृत्यु भएको छ ।

बिहीबार लेबनानबाट भएको सीमापार गोलीबारीमा ४ थाई नागरिकसहित इजरायलमा ७ जनाको मृत्यु भएको थियो । इजरायली सेनाले ३० सेप्टेम्बरमा स्थल कारबाही सुरु भएयता लेबनानमा ३७ सैनिकको मृत्यु भएको जनाएको छ ।