दाङ – प्रहरीले हातहतियारसहित १ जनालाई पक्राउ गरेको छ ।

लमही नगरपालिका–३ बनगाउँस्थित हरियाली टोल बस्ने ४० वर्षीय गणेश कुमाललाई विभिन्न हातहतियारसहित बिहीबार बिहान प्रहरीले पक्राउ गरेको छ ।

कुमालले आफ्नै घरमा अवैध हातहतियार लुकाइछिपाई राखेको भन्ने सूचना प्राप्त हुनासाथ वडा प्रहरी कार्यालय लमहीबाट खटिएको प्रहरीले घर तलासी गर्दा भरूवा बन्दुक २ थान, खाली बट, बन्दुकको काठको बट १ थान, बन्दुक नाल १ थान, बन्दुकको नाल बनाउन प्रयोग हुने फलामको पाईप १ थान, बारुद २१२ ग्राम २३० मिलिग्राम, छर्रा १३५ थान, केप १८ थान, ठूलो गोली २९ थान लगायतका हातहतियार फेला पारी उनलाई पक्राउ गरेको छ ।

हातहतियार सम्बन्धमा आवश्यक अनुसन्धान गरिरहेको प्रहरीले जनाएको छ ।