काठमाण्डु – नेपाली सेनाका प्रधानसेनापति अशोकराज सिग्देलले विगत द्वन्द्व तथा कर्तव्य पालनको दौरान वीरगति प्राप्त गरेका सकलदर्जाका एकल महिलाहरूसँग जङ्गी अड्डामा भेटघाट गरेका छन् ।

कार्यक्रममा प्रधानसेनापति सिग्देलले विगत द्वन्द्वको समय लगायत विभिन्न अवस्थामा कर्तव्य पालनको सिलसिलामा वीरगति प्राप्त सकलदर्जाको योगदानलाई स्मरण गर्दै अपुरणीय क्षतिको बाबजुद शोकलाई शक्तिमा बदली एकल महिलाहरूले समाजमा विभिन्न उद्यममार्फत आफू लगायत आफ्ना सन्ततीलाई स्थापित गराएकोमा प्रशंसा गरे ।

प्रधानसेनापति सिग्देलले वीरगती प्राप्त सकलदर्जाको हकहितका लागि सदैव प्रयत्नशील रहेको उल्लेख गर्दै नेपाली सेना सदैव साथमा रहेको समेत बताए । सो अवसरमा प्रधानसेनापतिले एकल महिलासँग अन्तर्क्रिया समेत गरेका थिए ।

सो अवसरमा प्रधानसेनापतिले एकल महिला भएपश्चात पनि आफ्नो अध्ययनलाई निरन्तरता दिई उच्च शिक्षा हासिल गर्ने एकल महिला श्रीमती नारायणी कँडेल र आफ्नो सन्ततीलाई उच्च शिक्षा हासिल गर्न प्रेरणा दिई सफल अभिभावकत्व निर्वाह गर्ने श्रीमती रिता भण्डारीलाई नगद ४० हजारसहित विशेष सम्मान गरे ।

कार्यक्रममा प्रधान सेनापतिले उपस्थित वीरगति प्राप्त सकलदर्जाका परिवारहरूलाई नगद र दोसल्लासहित सम्मान गरेका छन् ।

प्रधानसेनापति सिग्देलले पदबहालीपश्चात् सकलदर्जालाई गरेको पहिलो सम्बोधनका क्रममा वीरगति प्राप्त तथा कर्तव्य पालनको सिलसिलामा मृत्यु भएका सकल दर्जाका एकल महिलाहरू एवं पारिवारिक निवृत्तिभरणमा रहेका एक महिलाहरूलाई प्रदान गरिँदै आएको कल्याणकारी निवृत्तिभरणमा मासिक ५०० रुपैयाँका दरले थप गर्ने उल्लेख गरेका थिए । सोही अनुरूप समूहमा रहेका एकल महिलाहरूलाई नेपाली सेनाले पारिवारिक निवृत्तिभरणको रूपमा वीरगतितर्फ मासिक ३ हजार ५०० रुपैयाँ र कर्तव्य पालनातर्फ मासिक २५०० प्रदान गरिरहेकोमा २०८१ असोज महिनाबाट मासिक ५०० रुपैयाँ थप गरी वीरगतितर्फ मासिक ४ हजार र कर्तव्य पालनातर्फ मासिक ३ हजार प्रदान गर्दै आइरहेको छ ।

कार्यक्रममा बलाध्यक्ष रथी प्रदीपजंग केसी, रथीवृन्द तथा अधिकृतहरूको उपस्थिति थियो ।