काठमाण्डु-जर्मन बुन्डेस लिगामा बायर्न म्युनिखले आरबी लेपजिङमाथि सानदार जित हात पारेको छ ।

गएराति भएको खेलमा बायर्न म्युनिखले लेपजिङमाथि ५–१ गोलअन्तरको जित निकालेको हो । खेलमा सुरुवाती अग्रता बायर्न म्युनिखले नै लिएको थियो ।

खेलको पहिलो मिनेटमै जमल मुसियालाले गोल गर्दै बायर्नलाई सुरुवाती अग्रता दिलाएका थिए । तर, त्यसको एक मिनेटपछि लेपजिङका लागि बेन्जामिन सेस्कोले गोल गर्दै खेल १–१ गोलको बराबरीमा ल्याएका थिए ।

खेलको २५औँ मिनेटमा कोनराड लाइमरले गोल गर्दै बायर्नलाई २–१ को अग्रता दिलाए । खेलको ३६औँ मिनेटमा जोसुवा किमिचले गोल गर्दै बायर्नलाई ३–१ को अग्रता दिलाएका थिए ।

पहिलो हाफमा ३–१ को अग्रता लिएको बायर्नले दोस्रो हाफमा थप दुई गोल गरेको थियो । खेलको ७५औँल मिनेटमा लोरे सानेले गोल गर्दै बायर्नलाई ४–१ गोलको अग्रता दिलाए ।

त्यसपछि खेलको ७८औँ मिनेटमा अल्फान्सो डेविसले गोल गरेपछि बार्यन लेपजिङमाथि ५–१ को जित निकाल्न सफल भयो । लिगको शीर्ष स्थानमा रहेको बायर्नले १५ खेलबाट ३६ अंक जोडेको छ । पराजित लेपजिङ भने १५ खेलबाट २७ अंकका साथ लिगको चौथो स्थानमा छ ।