काठमाण्डु-सार्वजनिक लेखा समिति सभापति ऋषिकेश पोखरेलकी पत्नी अञ्जला कोइराला अदालतमा हाजिर भएकी छन् ।

प्रहरीको फरार सूचीमा रहेकी कोइराला मोरङ जिल्ला अदालतमा उपस्थित भएकी हुन् । कोइरालाविरुद्ध थुनछेक बहस सुरु हुने अदालत प्रशासनले जनाएको छ ।

मोरङ धनपालथान–४ मा रहेको उमागौरी कृषि सहकारीको रकम अपचलनमा तत्कालीन संचालक समिति सदस्य रहेका कारण मुछिएकी कोइरालालाई अदालतले पुस २ मा पक्राउ पूर्जी जारी गरेपछि फरार थिइन् ।

सहकारीका अध्यक्ष कोइराला, शम्भु रौनियार, रंगेली–२ का वडाध्यक्ष सन्तलाल खवाससहित २६ जनाविरुद्ध अदालतले पक्राउ पूर्जी जारी गरेको थियो ।

वडाध्यक्ष खवास ५ लाख रुपैयाँ धरौटी बुझाएर रिहा भइसकेका छन् । सोही प्रकरणमा नाम जोडिएकी कोइराला भने अदालत खुल्ने बित्तकै हाजिर भएकी हुन् ।

कोइराला पेशाले शिक्षक हुन् । लेखा समिति सभापति पत्नी उनी विराटनगरस्थित महेन्द्र रात्री माध्यमिक विद्यालयमा शिक्षिका हुन् ।

अदालतले पक्राउ पूर्जी जारी गरेपछि उनी विद्यालयमा पत्र लेखेर अनुपस्थित रहँदै आएकी छिन् । ‘भर्चुअल’ माध्यमबाट उनका सांसद पति पोखरेलले विद्यालयमा पत्र प्रेषित गरेका थिए ।

विद्यालयका प्रधानाध्यापक झंकनाथ पराजुलीले कोइरालाको थप बिदाका लागि लिखित निवेदन आएको र त्यो निवेदन उनका पति पोखरेलमार्फत आएको बताएका थिए ।