काठमाण्डु-अमेरिकाको भर्जिनियामा कार दुर्घटना हुँदा दुई नेपालीको मृत्यु भएको छ । मृत्यु हुनेमा चालक ५५ वर्षीय कर्ण खड्का र २० वर्षीय निश्चल भट्ट छन् ।

एनबीसी वाशिङ्गटनका अनुसार बिहीबार बिहान भर्जिनियाको स्यान्टिल्लीमा रहेको विन्डम होटेल परिसरको पोखरीमा कार खस्दा उनीहरूको डुबेर मृत्यु भएको हो । हिउँमा चिप्लिएर १० फिट जमेको पानीमा उनीहरू सवार कार खसेको थियो ।

उद्धारका लागि पोखरीमा प्रहरी पुग्दा उनीहरूको मृत्यु भइसकेको थियो ।

खड्का सोही होटेलमा हाउस किपिङमा काम गर्दै आएका थिए भने उनले आफ्नो भान्जा नाता पर्ने भट्टलाई त्यही होटलमा काम लगाइदिने भनेर ल्याएका थिए ।