काठमाडौं–पाँच हजारभन्दा बढी अमेरिकी डलर सटही गर्न नेपालीले अनिवार्य स्थायी लेखा नम्बर (पान) लिनुपर्ने प्रावधान लागूू भएको छ।

राष्ट्र बैंकको विदेशी विनिमय व्यवस्थापन विभागका कार्यकारी निर्देशक भिष्मराज ढुंगानाका अनुसार शिक्षा, आप्रवास, स्वास्थ्यलगायत प्रयोजनका लागि विदेशी मुद्रा माग गर्ने नेपालीहरूले अनिवार्य पान लिनुपर्ने भएको हो।

विदेशी मुद्रा माग गर्दा विदेशी मुद्रा माग गर्ने व्यक्ति वा निजको एकाघर परिवार सदस्यहरूमध्ये आमा वा बुबामध्ये कुनै एक जनाको पान नम्बर पेश गरेका पनि मुद्रा सटही गर्न सकिने सुविधा राष्ट्र बैंकले जानकारी दिएको छ।

यसैबीच, विदेशमा कमाएको पैसा कारोबार भएको १५ दिनभित्र नेपाल ल्याइसक्न पनि राष्ट्र बैंकले निर्देशन जारी गरेको छ। ट्राभल एजेन्सी, ट्रेकिङ एजेन्सी, कार्गो कुरियर एजेण्ट, होटल लगायतका संस्थाहरुले विदेशबाट भुक्तान लिएका रकम विदेशी मुद्रा कारोबार भएको १५ दिनभित्र नेपाल राष्ट्र बैंक विदेशी विनिमय व्यवस्थापन विभागमा पठाउन निर्देशन दिएको हो ।