सिरहा – गत वैशाख २८ गते सिरहाको सिमावर्ती बरियारपट्टि गाउँपालिका–४ तेनुवापट्टिमा एक सैनिक जवानलाई कुटपिट गरेको आरोपमा एक जना पक्राउ परेका छन् । पक्राउ पर्नेमा तेनुवापट्टिका मगंला भनिने मंगल साह रहेको सिरहा प्रहरी प्रमुख एसपी जिवनकुमार श्रेष्ठले जिल्ला प्रहरी कार्यालय सिरहामा पत्रकार सम्मेलन गरी जानकारी दिएका हुन् ।

गाउँलेको कुटपिटबाट घाइते भएका छिमेकी गाउँ सोहपुरका २५ वर्षीय सैनिक जवान अनिशकुमार सिंहको जेठ २ गते काठमाडौंस्थित विरेन्द्र सैनिक अस्पतालमा मृत्यु भएको थियो ।

कुटपिटबाट मृत्यु भएपछि अनिशका बुवा नरेन्द्र सिंहले आफ्नो छोरालाई घरबाटै अपहरण गरी हत्या गरिएको भन्दै प्रहरीमा २५ जनाभन्दा बढी व्यक्तिमाथि किटानी जाहेरी दर्ता गराएका छन् ।

यता, तेनुवापट्टिका स्थानीयले गाउँमा सिंहसहित युवाले चोरी गर्न आएका भन्दै कुटपिट गरी इलाका प्रहरी चौकीमा निवेदन दिएका थिए । पक्राउ परेका व्यक्तिको माध्यमबाट घटनाबारे थप अनुसन्धान भइरहेको एसपी श्रेष्ठले बताए । फरार रहेका आरोपितको खोजि भइरहेको उनले जनाए ।

बराह दल गुल्म सखुंवासभामा कार्यरत सिंह वैशाख ७ गते एक महिने बिदामा घर आएका थिए ।