काठमाडौं– ग्लोबल फायर पावरले सन् २०१७ को सैन्य शक्ति सूची प्रकाशित गरेको छ । विश्व सुरक्षा फौजको शक्ति विश्लेषण गर्ने अनुसन्धान संस्था ग्लोबल फायर पावरले सार्वजनिक गरेको सुचिमा नेपाल पहिलोपटक परेको हो ।

सुचिका अनुसार नेपाल ९७ औं स्थानमा छ । पुछारमा भुटान छ । १३३ देश सामेल रहेको सूचीमा यसअघि जस्तै अमेरिका पहिलो नम्बरमा परेको छ । दोस्रोमा रसिया परेको छ भने नेपालका दुइ छिमेकी चीन र भारत क्रमश तेस्रो र चौथो स्थानमा परेका छन् ।

नेपालभन्दा कमजोर ३६ वटा देश रहेको सूचीमा उल्लेख छ । यसमा परम्परागत युद्ध हतियार र उपकरणको मात्र विश्लेषण गरिएको छ । परमाणु हतियार सामेल छैन । सूचीमा उल्लेख भएअनुसार पाकिस्तान विश्वका १३ औ सैन्य शक्तिशाली देश हो जहाँको रक्षा बजेट सात अरव डलर हुने गरेको छ । सक्रिय सैनिकको संख्या ६ लाख ३७ हजार छ भने तीन लाख रिजर्भ सैनिक रहेका छन् ।

नेपालको अवस्था के ?

सेनाको वर्गीकरण र विश्लेषणका आधारमा नेपाली सैनासँग हवाई सैन्य शक्ति नरहे बराबर छ तर स्थल सेनाकै भरमा नेपालको वर्गीकरण गरिएको हो । नेपाली सेनासँग कूल १ लाख ५७ हजार सैन्य जनशक्ति छ । यसमा क्रियाशिल करिब ९५ हजार र ६२ हजार रिर्जव रहेका छन् ।

२२ वटा सैन्य विमान र हेलिकोप्टरमा १८ वटा चालु अवस्थामा छन् । नेपाली सेनासँग १ हजार ४८० बख्तरबन्द लडाकु सवारी साधन र १२० आर्टलरी रहेका छन् । नेपाली सेनामा भर्ना योग्य जनशक्ति तयारी अवस्थामा ७ लाख ५० हजार रहेको सुचिमा उल्लेख छ ।