कर्नाटक– कर्नाटकको बैंगलोरस्थित हनुमन्तनगर प्रहरी थानामा एक व्यक्तिले आफ्नो १३ करोड रुपैयाँको कुकुर हराएको रिपोर्ट दर्ता गराएका छन् ।

चेतन एन नामक व्यक्तिले कुकुर खोजेर ल्याउनेलाई १ लाख ६० हजार रुपैयाँको पुरस्कार दिने घोषणा समेत गरेका छन् । कुकुर अलास्कन मलामुट जातको हो । यसको १ बच्चाको मूल्य पनि लाखौ हुन्छ ।

मिडिया रिपोर्टका अनुसार चेतनले यो कुकुर चीनको बेइजिङबाट किनेर ल्याएका थिए । प्रहरीका अनुसार चेतनले यो कुकुर कसैले चोरेर लगेको शंका गरेका छन् ।

आफूले कुकुरलाई रेखदेखका लागि दक्षिण बैंगलोरमा श्रीनगर निवासी सौम्यालाई एक सम्झौता अनुसार सुम्पेको चेतनले बताएका छन् । सोही स्थानबाट कुकुर हराएको थियो ।

यो भन्दा पहिले अमेरिकाको सन फ्रान्सिस्कोमा पनि यस्तै घटना भएको थियो । अमेरिकामा एक महिलाको कुकुर एक ग्रोसरी स्टोरबाट चोरी भएको थियो ।

महिलाले कुकुर खोज्नका लागि विमान चार्टर गर्नुका साथै पुरस्कारको घोषणा समेत गरेकि थिइन । तर उनी कुकुर पेला पार्न सफल भइनन् ।