काठमाण्डु – चितवन र सुनसरीमा भएका छुट्टाछुट्टै सवारी दुर्घटनामा परी २ जनाको मृत्यु भएको छ । चितवन, भरतपुर महानगरपालिका-२९ स्थित सडकमा बा.१९ च. ७६७७ नम्बरको बलेरो जिप र ग.२ ख ४३१९ नम्बरको ट्रक आपसमा ठक्कर खाई बुधबार बिहान दुर्घटना हुँदा जीप चालक धादिङ गजुरी गाउँपालिका-२ बस्ने ३० वर्षीय शंकर सेढाईंको मृत्यु भएको छ ।

दुर्घटनामा गम्भीर घाईते भएका सेढाईको पूरानो मेडिकल कलेज भरतपुरमा उपचारको क्रममा मृत्यु भएको हो । ट्रक र चालकलाई प्रहरीले नियन्त्रणमा लिएको छ । सुनसरी, धरान उपमहानगरपालिका-८ स्थित सडकमा सोमबार साँझ को.८ प ९३०२ नम्बरको मोटरसाइकलको ठक्करबाट हाल नाम, थर, वतन नखुलेकी ७५ वर्षीया महिलाको मृत्यु
भएको छ ।

ठक्करबाट गम्भीर घाइते भएकी महिलाको धरान घोपामा उपचारको क्रममा मंगलबार साँझ मृत्यु भएको हो । दुर्घटनाका सम्बन्धमा स्थानीय प्रहरीले थप अनुसन्धान गरिरहेको छ ।