काठमाडौं– सशस्त्र प्रहरी महानिरीक्षक शैलेन्द्र खनालले आफुले २ वटामात्रै सवारी साधन प्रयोग गर्ने गरेको दाबी गरेका छन् । सशस्त्र प्रहरी बल प्रधान कार्यालयले सोमबार महानिरीक्षक खनालले ८ वटा सवारी साधन प्रयोग गर्ने गरेको भन्दै सञ्चारमाध्यामहरुमा आएको समाचारको खण्डन गरेको हो ।

सशस्त्र मुख्यालयले आईजिपी खनालले २ वटामात्रै सवारी साधन प्रयोग गर्ने गरेको दाबी गरेको छ ।

सशस्त्र प्रहरी बलका प्रवक्ता एवम् सशस्त्र प्रहरी नायव महानिरीक्षक सुरजकुमार श्रेष्ठले आज एक विज्ञप्ति जारी गर्दै महानिरीक्षक खनालसंग जोडिएर आएको उक्त समाचारप्रति प्रहरी संगठनको गम्भीर ध्यानाकर्षण भएको जनाएका छन् ।

डिआईजी श्रेष्ठले जारी गरेको विज्ञप्तिमा भनिएको छ – सशस्त्र प्रहरी बल नेपालसँग रहेका सवारी साधनहरु विभिन्न सुरक्षा प्रयोजनमा सशस्त्र प्रहरी बल नेपाल प्रधान कार्यालय एवम् सशस्त्र प्रहरी बल नेपालका विभिन्न कार्यालयहरु तथा सशस्त्र प्रहरी कर्मचारीहरुले प्रयोग गर्ने गरेको जानकारी गराइएको छ ।