काठमाडौं– अमेरिकी सेनाको इण्डो प्यासेफिक कमाण्डका कमाण्डर एडमिरल फिलिप एस डेभिसन दुई दिने नेपालको औपचारिक भ्रमणको सिलसिलामा काठमाडौं आएका छन् । नेपाली सेनाको प्रधानसेनापतिमा पूर्णचन्द्र थापा नियुक्त भएपछि नेपाल भ्रमण गर्ने डेभिसन पहिलो अमेरिकी जनरल हुन् । जनरल डेभिसनलाई विहिवार सैनिक तालिम तथा डक्ट्रिन महानिर्देशक उपरथी गौरव तण्डुलले त्रिभुवन अन्र्तराष्ट्रिय विमानस्थलमा स्वागत गरेका थिए । 

जनरल डेभिसनले विहिवार नै नेपाली सेनाका प्रधानसेनापति थापासंग भेटवार्ता गरेका छन् । भेटवार्तामा नेपालस्थित अमेरिकी राजदूत रेण्डि डव्लु वेरी समेत सहभागी थिए । 

भेटमा नेपाली सेना र अमेरिकी सेनाबीच गर्न सकिने सहकार्यका विषयमा छलफल भएको बताईन्छ । सैनिक जनसम्र्पक निर्देशनालयले द्धिपक्षिय हित तथा पारस्पारिक सम्बन्धका विषयमा छलफल भएको जनाएको छ । 

भेटमा प्रधानसेनापति थापाथापासंग अमेरिकाले नेपाली सेनालाई दिने भनिएको स्काई ट्रक र नेपाली सेनाका लागी ल्याउन लागिएको एम १६ हतियारका वारेमा समेत छलफल भएको स्रोतको दावी छ । जनरल डेभिसनले प्रधानसेनापति थापालाई भेटमा अमेरिका भ्रमणको निम्तो समेत दिएका छन् । 

डेभिसनले टुंडिखेलस्थित सैनिक मंचमा रहको वीर स्मारिकामा माल्यार्पण गरेका थिए । त्यसका साथै उनको सम्मानमा सैनिक मुख्यालय परिसरमा नेपाली सेनाको एक टुकडीे सम्मान गारत अर्पण गरेको थियो । 

अमेरिकी सेनाको प्यासेफिक कमाण्ड हेर्ने जनरल डेभिसनले प्रधानमन्त्री केपी शर्मा ओली र  रक्षामन्त्री ईश्वर पोखरेलसंग शुक्रवार भेटवार्ता गर्ने कार्यक्रम छ । उनले नेपाली सेनाको पांचखालस्थित वीरेन्द्र शान्ति कार्य तालिम केन्द्रको समेत निरीक्षण गर्ने कार्यक्रम छ । 

दुई साता अघि परराष्ट्रमन्त्री प्रदिप ज्ञवाली अमेरिका भ्रमणमा गएका थिए । ज्ञवालीको भ्रमणको क्रममा अमेरिकाले उनिसंग उत्तर कोरीया र इण्डो प्यासेफिक रणनितीको वारेमा छलफल भएको जनाएको थियो ।

इण्डो प्यासेफिकमा सहभागीता जनाउनेबारे छलफल भएको भन्ने अमेरिकी भनाईको मन्त्री ज्ञवालीले खण्डन गरेका थिए । ज्ञवाली फर्केको दुई सातापछि नै प्यासेफिक हेर्ने अमेरिकी जनरल काठमाडौं आउंनु संयोग मात्र नभएको स्रोतको दावी छ ।