काठमाण्डु – नेपाली सेनाका प्रधानसेनापति अशोकराज सिग्देल मंसिर २६ गते भारत भ्रमणमा जाने भएका छन् ।

भारतका स्थल सेनाध्यक्ष जनरल उपेन्द्र द्विवेदीको औपचारिक निमन्त्रणामा प्रधानसेनापति सिग्देलले मंसिर २६ गतेदेखि मंसिर २९ गते (तदनुसार ११–१४ डिसेम्बर २०२४) सम्म भारतको भ्रमण गर्ने कार्यक्रम तय भएको नेपाली सेनाले जनाएको छ ।

भ्रमणको क्रममा उनलाई भारतका राष्ट्रपतिबाट भारतीय सेनाको मानार्थ महारथीको दर्जाबाट सुशोभित गर्ने कार्यक्रम छ । सो अवसरमा प्रधान सेनापतिले भारतका उच्च पदस्थ पदाधिकारीहरूसँग भेटघाट गर्नुका साथै इन्डियन मिलिट्री एकेडेमीमा तालिमरत अधिकृत क्याडेटहरूको अन्तिम दलेल कवाजमा प्रमुख अतिथिको रूपमा सहभागी हुने कार्यक्रम छ ।