काठमाण्डु – उद्योग, वाणिज्य तथा आपूर्ति मन्त्रालय अन्तर्गतको वाणिज्य, आपूर्ति तथा उपभोक्ता संरक्षण विभागले मंगलवार विभिन्न उद्योग तथा फर्महरूको अनुगमन गरेको छ ।

अनुगमनका क्रममा उपभोक्ता संरक्षण ऐन २०७५ तथा उपभोक्ता संरक्षण नियमावली २०७६ को उल्लंघन पाइएपछि विभागले सम्बन्धित व्यवसायीहरूलाई आवश्यक निर्देशन तथा कारबाही गरेको छ ।

अनुगमनका क्रममा एउटा फर्मको बिक्री रोक्कासहित ८ फर्मलाई कागजातसहित विभागमा उपस्थित हुन निर्देशन दिएको छ ।

‘स्वच्छ र प्रतिस्पर्धी बजारः उपभोक्ता संरक्षणको दीगो आधार’ भन्ने नाराका साथ गरिएको अनुगमनका क्रममा स्पार्क अटो केयर प्रालि (काठमाण्डु महानगरपालिका–८) बिक्री वितरण रोक्का गर्दै सम्बन्धित कागजातसहित विभागमा उपस्थित हुन निर्देशन दिएको छ भने ६ वटा फर्मलाई कागजातसहित विभागमा उपस्थित हुन निर्देशन दिएको छ ।

गौरङ्ग सारीज प्रालि (काठमाण्डु महानगरपालिका–३१), सीजी मोटर्स प्रालि (ललितपुर महानगरपालिका–०२), एसियन बिस्कुट एण्ड कन्फेक्सनरी प्रालि (विराटनगर महानगरपालिका–०९), सिजन आईटी (काठमाण्डु महानगरपालिका–२२), अर्बन गेअर्स (काठमाण्डु महानगरपालिका–३१), गाभिनो फेसन वेयर (काठमाण्डु महानगरपालिका–३१) लाई कागजातसहित विभागमा उपस्थित हुन निर्देशन दिएको छ ।

भीजी अटोमोबाइल्स प्रालि (काठमाण्डु महानगरपालिका)को भने बिक्री वितरण फुकुवा गरिएको छ ।

विभागले उपभोक्ताको हक र हित संरक्षण गर्दै बजारलाई स्वच्छ र प्रतिस्पर्धी बनाउने उद्देश्यले निरन्तर अनुगमन तथा आवश्यक कारबाही गर्ने जनाएको छ । उपभोक्ता अधिकार सुनिश्चित गर्न व्यवसायहरूले कानूनी प्रावधानहरू पूर्ण रूपमा पालना गर्नुपर्ने विभागको भनाइ छ । विभागका अनुसार २० चैतदेखि सबै सामग्रीहरूमा अधिकतम खुद्रा मूल्य (एमआरपी) अनिवार्य गरिएको छ ।

विभागका महानिर्देशक कुमार दहालले भने, ‘जोखेर वा नापेर विक्री गर्ने बाहेकका सबै सामग्रीमा एमआरपी अनिवार्य गरेका हौं । जसले गर्दा स्वच्छ तथा पारदर्शी बजार हुनेछ, सानो सामग्रीदेखि ठूला गाडीहरूमा सम्म सबैमा एमआरपी उल्लेख हुनुपर्नेछ ।’

उद्योग वाणिज्य तथा आपूर्ति मन्त्री दामोदर भण्डारीको कडा निर्देशनमा विभागले उपभोक्ता ठगी हटाउन एक्सन लिएका हुन् ।