काठमाण्डु । परराष्ट्रमन्त्री आरजु राणा देउवा ११ दिने औपचारिक भारत भ्रमण सकेर स्वदेश फिर्ता भएकी छिन् ।

शुक्रबार त्रिभुवन अन्तर्राष्ट्रिय विमानस्थलमा पत्रकार सम्मेलन गर्दै उनले आफ्नो भारत भ्रमणबारे जानकारी गराउँदै भारतमा हुँदा हाल नेपालमा देखिएको विद्युत अभावको समाधानको लागि पनि कुटनीतिक प्रयास गरेको बताइन् ।

उनले भनिन्,‘भारतमा हुँदा मैले हाल नेपालमा देखिएको विद्युत अभावको समाधानको लागि पनि कुटनीतिक प्रयास गरें । भ्रमणका क्रममा भएको दुई पक्षीय भेटवार्ताको क्रममा मानव अधिकार परिषद्मा नेपालको २०२७ देखि २०२९ सयुक्त राष्ट्रसंघीय आर्थिक तथा सामाजिक परिषद्मा २०२९ देखि २०३१ तथा सयुक्त राष्ट्र संघको सुरक्षा परिषद्मा २०३७ देखि ०३८ का लागि नेपाललले दिएको उमेद्वारीबारे पनि नेपालको समर्थनका लागि आग्रह गरेको छु । प्रतिक्रिया पनि सकारात्मक आएको छ ।’

उनले नेपालमा पछिल्लो समय भइरहेका राजनीतिक गतिविधिबारे धेरै कुरा नभएको भए पनि भारतीय पक्षको समर्थन भने लोकतान्त्रिक गतिविधिलाई नै रहने पाएको बताइन् ।

उनले भनिन् ‘यहाँको राजनीतिक गतिविधिको बारेमा धेरै कुरा त गरेनौं । तर उहाँहरूको सपोर्ट चाहिँ डेमोक्राटिक सिस्टमलाई नै छ भन्ने कुरा उहाँहरूको हरेक गतिविधिबाट हामीले बुझ्न जरुरी छ,’ राणाले भनिन्, ‘अहिलेको सरकारसँग एकदमै इन्गेज्ड हुनुहुन्छ । सरकारको सिस्टमनै परिवर्तन हुनेजस्तो आशय मैले देखिनँ ।’

उनले भारतको विदेश मन्त्रालयको सहयोगमा ओआरएफले आयोजना गरेको राइसिना डायलगमा सहभागी भएको पनि जानकारी गराइन ।

डायलगको क्रममा उनले भारतीय विदेशमन्त्री डा.एस जयशंकरसँग पनि भेटवार्ता गरेकी थिइन् । उनी मार्च १० तारिख भारत भ्रमणमा गएकी थिइन् । राइसिना डायलगमा सहभागी हुनुअघि उनी भारतको झारखण्डस्थित बाबा बैद्यनाथ धाममा पुगेर पूजाआजा समेत गरेकी थिइन् ।