काठमाण्डु – बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक) को छैटौं शिखर सम्मेलनमा भाग लिन नेपाल चेम्बर अफ कमर्सको पदाधिकारी टोली प्रधानमन्त्री केपी शर्मा ओलीसँगै थाइल्याण्ड गएको छ ।

निजी क्षेत्रबाट प्रतिनिधित्व गर्दै अध्यक्ष कमलेश कुमार अग्रवाल, चेम्बर सल्लाहकार परिषद् अध्यक्ष राजेशकाजी श्रेष्ठ, वरिष्ठ उपाध्यक्ष दिपक मल्होत्रा र मानार्थ उपाध्यक्ष एवं अन्तरराष्ट्रिय सम्बन्ध समितिका सभापति अर्जुनप्रसाद शर्मा प्रधानमन्त्री ओलीसँगै मंगलबार थाइल्याण्ड गएका हुन् । थाइल्याण्ड भ्रमणका क्रममा दुईपक्षीय व्यापार सहजीकरण, पर्यटन प्रवद्र्धन, लगानी अभिवृद्धि लगायतका विषयमा समझदारी एवं सम्झौता हुने चेम्बर अफ कमर्सले जनाएको छ ।

नेपाल चेम्बर अफ कमर्स र टुरिज्म काउन्सिल अफ थाइल्याण्डबीच व्यापार, पर्यटन र नागरिक उड्डयनको क्षेत्रमा छुट्टै सम्झौताको तयारी समेत भएको छ ।

थाइल्याण्ड भ्रमणका क्रममा प्रधानमन्त्री ओलीसँगै चेम्बर पदाधिकारी टोलीले त्यहाँका प्रतिष्ठित व्यवसायीसँग भेटघाट र छलफल गर्ने कार्यक्रम तय भएको छ । थाइल्याणको निजी क्षेत्रसँग २ पक्षीय व्यापार सहजीकरण, नेपालमा लगानी अभिवृद्धि जस्ता विषयमा छलफल गर्न लागिएको चेम्बर अफ कमर्सका अध्यक्ष कमलेश कुमार अग्रवालले बताए ।

नेपाल र थाइल्याण्डका पर्यटकीय क्षेत्रहरूको पहिचान र प्रवद्र्धन गर्दै संयुक्त रूपमा बजार प्रवद्र्धनात्मक अभियान, नागरिक उड्डयनको क्षेत्रमा संयुक्त सहकार्य, सम्पदा र संस्कृतिको आदानप्रदान, व्यापार एवं लगानी अभिवृद्धिका लागि सहकार्य गर्ने चेम्बरको तयारी छ । चेम्बर पदाधिकारी टोली आगामी चैत २२ गते स्वदेश फर्किनेछ ।