काठमाडौं – उच्च अदालत पाटनले विप्लव नेतृत्वको नेकपाका उपत्यका ब्यूरो इञ्चार्ज माइला लामासहित ४ जनालाई थुनामुक्त गर्न आदेश दिएको छ ।

मुख्य न्यायाधीश नहकुल सुवेदी र न्यायाधीश श्रीकान्त पौडेलको इजलासले बिहीवार लामासहित चार जनालाई साधारण तारेखमा रिहा गर्न आदेश दिएको हो ।

थुनामुक्त हुनेहरुमा लामासहित ईश्वर परियार भन्ने ईश्वर दमाई, भृकुटी भन्ने धिरेन्द्राकुमारी उपाध्याय र हितमान भन्ने नवीन विश्वकर्मा छन् ।

राजधानीका विभिन्न स्थानमा भएका बम विस्फोटका घटनामा संलग्न रहेको आरोपमा लामा लगायतका नेताहरूलाई पक्राउ गरिएको थियो ।

अदालतले हेमन्त प्रकाश ओली, सूर्य भुजेल, लोकेन्द्र कुमार खड्का, बुद्धबहादुर सिताङ, शिव धिमाल, डिकेन्द्र राई र दोर्जी शेर्पालाई भने थुनामा नै राखेर मुद्दाको पुर्पक्ष गर्न भनेको छ ।