काठमाण्डु-चीनमा फैलिएको एचएमपीभी भाइरस भारतमा पुगेको छ । यसको पहिलो संक्रमित बेंगलुरुमा फेला परेको भारतीय सञ्चारमाध्यमले जनाएका छन् ।

यो भाइरसबाट आठ महिनाकी बालिका संक्रमित भएकी हुन् । राज्यको स्वास्थ्य विभागले अस्पतालको प्रयोगशालामा गरिएको परीक्षणमा एचएमपीभी भाइरस पुष्टि भएको जानकारी दिएको छ । कर्नाटक स्वास्थ्य विभागले केन्द्र सरकारलाई यसबारे जानकारी गराएको छ ।

भारतीय स्वास्थ्य विज्ञहरूले पनि भाइरस भारतमा भेटिएको पुष्टि गर्दै विशेष गरी जाडो मौसममा यो देखा पर्ने गरेको बताएको छ ।

बाल रोग विशेषज्ञ डा. सुरेश गुप्ताले एचएमपीभी नयाँ भाइरस नभएको र दुई दशकभन्दा बढी समयदेखि परिचित रहेको बताए । उनले भने, ‘यो भाइरस सामान्यतया जाडो मौसममा देखा पर्छ र इन्फ्लुएन्जा वा सामान्य भाइरल ज्वरो जस्तै व्यवहार गर्दछ ।’

यो भाइरसबाट संक्रमित बिरामीहरू चीनमा बढ्दै गएपछि भारतको केन्द्रीय स्वास्थ्य मन्त्रालयले छलफल गरेको छ । बैठकमा चीनमा फैलिएको भाइरसको अवस्था असामान्य नभएको निष्कर्ष निकालेको छ ।

उत्तरी चीनका केही सहरमा इन्फ्लुएन्जा (फ्लु) जन्य संक्रमणका बिरामी बढिरहेका त्यहाँको सेन्टर फर डिजिज् कन्ट्रोल (सीडीसी)ले जनाएको छ ।

सीडीसीले डिसेम्बर अन्तिम साता सार्वजनिक गरेको तथ्यांकानुसार, अस्पताल पुगेका मध्ये ३०.२ प्रतिशतमा चिसोजन्य इन्फ्लुएन्जा र ६.२ मा एनएचपीभीसँग मिल्दाजुल्दा लक्षण देखिएका छन् । उनीहरू एचएमपीभी संक्रमित नै हुन् भनेर सीडीसीले पुष्टि गरेको छैन । चीन सरकारले यसबारे आधिकारिक तथ्यांक हालसम्म सार्वजनिक गरेको छैन ।