नेपालगन्ज – नेपाली कांग्रेसका प्रवक्ता विश्वप्रकाश शर्माले एकपटक निर्वाचन हार्दैमा कांग्रेस कमजोर भयो भनेर विश्लेषण गर्नु गलत भएकाे दावी गरेका छन् । नेपाल प्रेस युनियन, बाँकेले अयोजना गरेको पत्रकार भेटघाटमा उनले अब हारको समीक्षा गरेर संगठन निर्माणमा कांग्रेस परिचालन हुने बताए ।

उनले दुई ठूला कम्युनिष्ट पार्टीको एकताले लोकतन्त्रलाई अझ बलियो बनाउने भएकाले आफ्नाे दलले नेकपा (एमाले) र नेकपा (माओवादी केन्द्र) एक हुनुलाई त्यही कडीका रुपमा लिएको बताउदै उनले भने ‘एकपटक निर्वाचन हार्दैमा नेपाली कांग्रेस कमजोर भयो भनेर विश्लेषण गर्नु गलत हो, अब हारको समीक्षा गरेर संगठन निर्माणमा कांग्रेस परिचालन हुन्छ ।’

उनले ढुंगामुढा र हडताल गर्नु असल प्रतिपक्षको गुण नभएकाे बताए।  प्रतिपक्षले आन्दोलन, हडताल गर्छ भन्ने आममान्यतामा कांग्रेस नरहेको बताउदैँ उनले भने ‘रचनात्मक तथा सिर्जनात्मक भूमिका प्रतिपक्ष दलले खेल्नुपर्छ, ढुंगामुढा गर्ने, हडताल गर्ने यो असल प्रतिपक्षको गुण होइन, नेपाली कांग्रेस असल प्रतिपक्ष हो ।’

वर्तमान सरकारको सय दिन पुगेपछि कामको समीक्षा नेपाली कांग्रेसले गर्ने बताउँदै उनले कमजोर र गलत पक्षमा खबरदारी तथा सही कामको समर्थनमा आफ्नाे दलले एक इन्च पनि कन्ज्युस्याँई नगर्ने बताए ।