एजेन्सी – आइसीसी महिला टी-२०एकदिवसीय विश्वकपअन्तर्गत एसिया क्षेत्रीय छनोटको खेलमा नेपाल थाइल्याण्डसँग ५७ रनले पराजित भएको छ । बिहीबार बिहान भएको खेलमा नेपाल ५७ रनले पराजित भएको हो ।

टस जितेर पहिले ब्याटिङ गरेको थाइल्याण्डले २० ओभरमा ७ विकेट गुमाएर एक सय २४ रन बनायो । उसका लागि ओपनर नाइमुइ चेइवइ ३२, बोचाथम १२ रन, चनीदा सुथिरुंगाले ३५ रन बनाइन् । यस्तै वोङपाकाले २८ रनको योगदान गरिन् ।

अन्तिम ओभरमा नेपाली कप्तान रुवीना क्षेत्रीले दुई विकेट लिइन् । उनी बाहेक बलिङमा नेपालका लागि नेरी थापा र कविता कुवँर दुई–दुई विकेट लिइन भने करुणा भण्डारीले एक विकेट लिइन् ।

जवाफमा नेपाल २० ओभरमा आठ विकेट गुमाउँदा ६७ रनमा रोकियो । दुई रन हुँदा दुई विकेट गुमाएको नेपालले आठ रन जोड्दा तेस्रो विकेट गुमायो । ओपनर काजल श्रेष्ठ र रोमा थापा मात्र एक(एक रनमा आउट भइन् भने कप्तान रुवीना क्षेत्री तीन रनमा पेभेलियन फर्किइन् ।

त्यसपछि चौथो विकेटका लागि इन्दु बर्मा र सरिता राना मगरले ४६ रनको साझेदारी गर्दै टिमको पारी सम्हाल्ने प्रयास गरेका थिए । तर इन्दु २९ र सिता १८ रनमा आउट भएपछि नेपालले ५६ रनमा ५ विकेट गुमायो । त्यसपछि नेपालका कुनै पनि खेलाडी धेरै बेर क्रिजमा टिक्न सकेनन् । यो प्रतियोगिताको शीर्ष स्थानमा रहने टिमले मात्र विश्वकप छनोटको अन्तिम चरणमा प्रवेश गर्नेछ ।