काठमाण्डु– भक्तपुरमा एक पुरुष मृत फेला परेका छन्। भक्तपुरको मध्यपुरठिमी नगरपालिका–९ बोडे निलबाराहीमा आइतबार बिहान ति पुरुष मृत फेला परेका हुन्।

आज विहान पिकनिक स्थलको पार्किङमा खोटाङको केपिलासगढी गाँउपालिका-२ घर भई हाल बोडे बस्ने ६६ वर्षका ओमप्रकाश राई मृत फेला परेको भक्तपुरका प्रहरी नायब उपरीक्षक (डीएसपी) ढुण्डिराज न्यौपानेले जानकारी दिए ।

उनी कबाडीको सामान संकलन गर्ने व्यक्ति रहेको प्रहरीले जनाएको छ ।

प्रहरीले दाहिने कानको छेउ र टाउकामा चोट लागेको अवस्थामा शव फेला परेकाले हत्या भएको हुनसक्ने आशंका गरेको छ । नजिकैं रगत लतपतिएको ढुंगा समेत फेला परेको छ ।

शव पोस्टमार्टमका लागि भक्तपुरको दुवाकोटस्थित केएमसी अपस्ताल पठाइएको छ ।

प्रहरीले हत्याको आशंकामा अनुसन्धान अगाडि बढाएको छ।