काठमाडौं– राजधानी काठमाडौंमा जारी एभरेष्ट प्रिमियर लिग (इपिएल) क्रिकेटमा भैरहवा ग्लाडियटर्सले पहिलो जित दर्ता गरेको छ।

बुधबार भएको खेलमा काठमाडौं किंग्स एलेवेनलाई ७ विकेटले पराजित गर्दै भैरहवाले प्रतियोगितामा जितको खाता खोलेको हो।

टस जितेर पहिले ब्याटिङ गरेको काठमाडौंले निर्धारित २० ओभरको खेलमा ८ विकेट गुमाएरु १ सय १८ रन जोडेको थियो।

काठमाडौंका लागि अमित श्रेष्ठले सर्बाधिक २९ रनको पारी खेले। काठमाडौंका सागर कुमारले २८ तथा राजु रिजालले २२ रनको पारी खेले।

भैरहवाका दीपेश श्रेष्ठले ३ विकेट हात पार्दा शरद भेषावकरले २ तथा आरिफ सेख र पुनित मेहराले १ विकेट लिए।

जवाफी ब्याटिङमा भैरहवाले १६ दशमलव २ ओभरमा ३ विकेट गुमाएर लक्ष्य भेटायो। सोमपाल कामीले गरेको सत्रौं ओभरको पहिलो बलमा छक्का र दोस्रो बलमा चौका प्रहार गर्दै आरिफ सेखले भैरहवालाई जिताएका थिए।