कठमाण्डु-आज एक स्वदेशीसहित दुई विदेशी फिल्महरू प्रदर्शनमा आएका छन् ।

वर्षा शिवाकोटीको स्टारर फिल्म ‘मोदीबेनी’ आजदेखि रिलिज भएको छ भने बलिउड फिल्म ‘और मे कहाँ दम था’ र हलिउड फिल्म ‘डेडपुल एण्ड वुल्भरिन’ हलमा लागेको छ ।

शङ्कर कोइराला निर्देशित फिल्ममा वर्षासहित नव अभिनेता अमर प्रताप श्रेष्ठ मुख्य भूमिकामा छन् ।

आनन्द विक्रम क्षेत्रीको लेखन रहेको फिल्मले कसैको मृत्यु पश्चात् भएको एउटा अविश्वसनीय कथामा आधारित रहेर प्रेम, बदला र पारिवारिक कथा भन्छ ।

फिल्ममा रेजिना उप्रेती, प्रवीण खतिवडा, सरोज खनाल, दिलीप केसी, जीवन भट्टराई, कमलमणि नेपाल, स्नेहा भट्टराई, सुब्रतराज आचार्य, हिउवाला गौतम लगायतको अभिनय छ ।

यस्तै आजबाट रिलिज भएको फिल्म ‘और मे कहाँ दम था’ एक्सन, रोमान्स ड्रामा जनरामा बनेको हो । यस फिल्ममा अजय देवगन र तब्बु, जिमी शेरगिल, सई मांजरेकर र शान्तनु महेश्वरी मुख्य भूमिकामा छन् ।

नीरज पाण्डेको लेखन तथा निर्देशन रहेको यस चलचित्रमा ओस्कार विजेता संगीतकार एमएम किरवानीको संगीत रहेको छ । यस फिल्मले सन् २००२ देखि २०२३ सम्मको प्रेमकथालाई देखाउँछ ।

शान लेवी निर्देशित हलिउड फिल्म ‘डेडपुल एण्ड वुल्भरिन’ एक्सन र कमेडी जनरामा बनेको हो । रायन रेनोल्ड्स, हग ज्याकम्यान, मोरेना बेकारिन, मैथ्यू म्याकफ्याडियन, शिओरी कुत्सुनाको अभिनय छ ।