काठमाण्डु – नेपाल सुपर लिगअन्तर्गत आज बुटवल लुम्बिनी एफसी लिगको शीर्ष स्थानमा उक्लिने दाउमा रहेको छ । शीर्ष स्थानमा पुग्ने लक्ष्यका साथ बुटवलले आज काठमाण्डु रेजर्ससँग प्रतिस्पर्धा गर्दैछ ।

बुटवल लिगको तेस्रो स्थानमा रहेको छ । काठमाण्डुविरुद्ध आजको खेल जितेमा बुटवल शीर्ष स्थानमा पुग्न सफल हुनेछ । प्रतियोगितामा तीन खेल खेलेको बुटवलको हालसम्म एउटामा जीत तथा दुईमा बराबरीका साथ पाँच अङ्क छ । काठमाण्डुसितको खेल जितेमा बुटवल आठ अङ्कका साथ शीर्ष स्थानमा उक्लिने छ ।

जारी प्रतियोगितामा बुटवल एकमात्र अपराजित टोली हो । यसअघि बुटवलले पहिलो खेलमा पोखरा थन्डर्सलाई २–० गोलले हराएको थियो । दोस्रो खेलमा बुटवलले चितवनसँग २–२ गोलको बराबरी खेलेको थियो । तेस्रो खेलमा पनि बुटवलले विराटनगरसँग २–२ गोलको बराबरीमा खेल टुङ्ग्याएको थियो ।

यसैगरी काठमाण्डु रेजर्स दोस्रो जीतको लक्ष्यका साथ आज बुटवलविरुद्ध मैदानमा उत्रिँदैछ । काठमाण्डुले हालसम्म तीन खेलमा एउटामा जीत, एउटामा बराबरी तथा एक खेलमा हार बेहोर्दै चार अङ्क जोडेको छ ।

पहिलो खेलमा काठमाण्डुले ललितपुरलाई पराजित गरेको थियो । दोस्रो खेलमा काठमाण्डु धनगढीसँग पराजित भएको थियो । तेस्रो खेलमा काठमाण्डुले पोखरासित बराबरी खेलेको थियो ।

बुटवलविरुद्धको खेलमा विजयी भएमा काठमाण्डु लिगको शीर्ष तीनमा उक्लिनेछ । त्रिपुरेश्वरस्थित दशरथ रङ्गशालामा बुटवल लुम्बिनी एफसी र काठमाण्डु रेजर्सबीच साँझ साढे ५ बजे खेल शुरु हुनेछ ।