पोखरा – नेपाली कांग्रेसका महामन्त्री गगनकुमार थापाले पूर्वाधारमा लगानी बढाउन सरकारले योजनाबद्ध रूपमा काम गर्नुपर्ने बताएका छन् ।

पोखरामा आईतबार आयोजित कार्यक्रममा उनले वर्तमान अवस्थामा संकलन हुने राजस्वमा ३५ प्रतिशतले वृद्धि गर्न सके मात्रै देशका आवश्यकता र राजनीतिक लक्ष्य पूरा हुने भन्दै यसतर्फ गम्भीर भएर लाग्नुपर्ने आवश्यकता औंल्याए ।

महामन्त्री थापाले राजनीतिक स्थिरता भए मात्र उद्योग व्यवसायमा लगानी बढ्ने भएकाले स्थिरता र विकास निर्माणका लागि उद्योगी व्यवसायीसँग सहकार्य गरेर अगाडि बढ्नुपर्ने बताए । ‘सहज रूपमा उद्योग सञ्चालन गर्न र विदेशी पर्यटकलाई आकर्षित गर्न हवाई टिकटको शुल्क घटाएर भए पनि नेपालको अर्थतन्त्रलाई बलियो बनाउन जरूरी छ,’ उनले भने, ‘राजमार्गको स्तरोन्नति, पर्यटन पूर्वाधारमा लगानी गरी सहज वातावरण बनाउन सरकारले योजनाबद्ध रूपमा काम गर्नुपर्छ ।’

राजनीतिक स्थिरताका लागि वर्तमान निर्वाचन प्रणालीमा सुधार गर्ने विषयमा छलफल भइरहेको भन्दै महामन्त्री थापाले कुनै पनि दलको बहुमत नहुँदा विकास निर्माण र जनचाहना पूरा हुन नसकेकाले यस विषयमा दलहरू सहमतिका साथ अगाडि बढ्नुपर्ने बताएका छन् ।