बागमती – तेल बोक्ने ट्यांकरभित्र लुकाएर लैजाँदै गरेको अवस्थामा ठूलो परिणाममा प्रतिबन्धित लागूऔषध गाँजासहित मंगलबार २ जनालाई मकवानपुर प्रहरीले पक्राउ गरेको छ ।

प्रहरी चौकी रातोमाटे मकवानपुरबाट खटिएको प्रहरी टोलीले पूर्वपश्चिम राजमार्गअन्तर्गत हेटौंडा उपमहानगरपालिका–१५ रातोमाटेबाट पालुङबाट वीरगञ्जतर्फ जाँदै गरेको ना७ख १७७१ नम्बरको ट्यांकरभित्र लुकाएर लैजाँदै गरेको अवस्थामा ३ क्विन्टल ९२ किलो प्रतिबन्धित लागूऔषध गाँजासहित २ जनालाई पक्राउ गरेको हो ।

पक्राउ पर्नेमा ट्यांककर चालक मकवानपुरको मनहरि गाउँपालिका–९ ज्यामिरे निवासी २६ वर्षीय रोशन पुरी र सहचालक २२ वर्षीय धनबहादुर मल्ल रहेको जिल्ला प्रहरी कार्यालय मकवानपुरका प्रवक्ता प्रहरी नायब उपरीक्षक श्याम अर्यालले जानकारी दिए ।

ट्यांकरभित्र गाँजा लगिइरहेको गोप्य सूचनाको आधारमा शरीर तथा ट्यांकर खानतलासी गर्दा ट्यांकरको ५ वटा डिब्बामध्ये ३ नम्बर डिब्बाभित्र २५ वटा रातो प्लाष्टिकको पोका बनाएर लुकाइछिपाई राखिएको अवस्थामा लागूऔषध गाँजा बरामद भएको प्रहरी नायब उपरीक्षक अर्यालले बताए ।

पक्राउ परेका दुवै जनामाथि थप अनुसन्धान भइरहेको उनले जानकारी दिए ।