काठमाडौं – अनसनरत डा. गाोविन्द केसीका माग र अनसनप्रति समर्थन जनाउनेलाई संसद भवन गेटअगाडिबाट प्रहरीले पक्राउ गरेको छ । डा. केसीका मागप्रति ऐक्यबद्धता जनाउँदै उनीसँग विगतमा भएको सहमतिअनुसार मात्रै चिकित्सा शिक्षा विधेयक पास गर्न जोड दिँदै आएका समर्थकहरूले संसद भवन अगाडि नाराबाजी गर्दै गर्दा पक्राउ परेका हुन।

पक्राउ पर्नेहरूमा विवेकशील नेपाली दलका संयोजक उज्वल थापा, सदस्यहरु शशी विक्रम कार्की,अजिता राई,डा दिनेश प्रसाईं,अम्बिका कार्की,सूजन श्रेष्ठ,रामजी पन्त,मिलन पाण्डे,सोनम थीमी, लगायतका २५ जना छन्। उनीहरूलाई हाल नेपाल पुलिस क्लब भृकुटीमण्डपमा राखिएको छ। बानेश्वर पानीट्यांकीको भाग संसदगेटमा नाराबाजी गरिरहेको अवस्थामा उनीहरुलाइ प्रहरीले गिरफ्तारी गरेको हो।

डा.केसीसँग गरिएको सम्झौताविपरीत चिकित्सा शिक्षा विधेयक शुक्रबार दिउँसो एक बजे बस्ने संघीय संसदको बैठकले पारित गर्ने तयारीमा सरकार छ। बिबेकशील नेपाली दलका नेता मिलन पाण्डेका अनुसार डा. केसीसँग १५ औँ अनशनमा सरकारले गरेको सम्झौतापत्र लिएर संसद भवनमा छिर्न खोजेपछि प्रहरीले पक्राउ गरेको हो ।

उनले भने,‘डा. गोविन्द केसीसँग १५ औँ अनशनका क्रममा सरकारले गरेको सम्झौता पत्र लिएर संसद भवनमा छिर्न खोज्दा हामीमाथि प्रहरीले दमन गरेको छ । केही साथीहरु घाइते भएका छन् ।’