काठमाडौं– उपप्रधान तथा स्वास्थ्यमन्त्री उपेन्द्र यादवलाई सम्बोधन गर्दै मन्त्रालयमा वीर अस्पताल, न्यूरो सर्जरी पहिलो युनिटका प्रमुख प्रा.डा. ध्रुवराज अधिकारीले राजीनामा पत्र बुझाएका छन् ।

सोमबार बुझाइएको पत्रमा ‘चाकडी र घुसको रकम र्पुयाउन नसकेकाले राजीनामा’ दिएको उल्लेख गरिएको छ । अधिकारीका अनुसार वीर अस्पतालमा पद खाली रहेको र अन्य उम्मेदवार समेत छैन । तर, आफूलाई पूर्वाग्रहका साथ वीरको सट्टा अन्यत्र सरुवा गर्न खोजिएको छ ।

आफूलाई दुःख दिने नियतले नै पोखरातिर सरुवा गर्न खोजेकाले चित्त दुखेको उनले बताए । आफूले उपप्रधान तथा स्वास्थ्यमन्त्री यादवलाई चार पटक भेटेको सुनाउँदै अधिकारीले भने, ‘उहाँ हुन्छ पनि हुन्न, हुन्न पनि भन्नु हुन्न । तपाईको त हुनु पर्ने हो । म आफैं आश्चर्यमा परेको छु कि अहिलेसम्म किन भएन मात्र भन्नु हुन्छ ।’

उनले राजीनामा पत्रमा भनेका छन् ‘विगत एक वर्षदेखि तलब विहिन भएर वीर अस्पतालको न्यूरो सर्जरीमा काम–काज गर्दै आएको र वीर अस्पतालले बारम्बार पत्र लेख्दा तथा मैले अथक प्रयास गर्द पनि पद खाली भएको र अन्य उम्मेदवारसमेत नहुँदा पनि मेरो पोस्टिङ वीरमा नगरी पूर्वाग्रसाथ दुःख दिएकोले र चाकडी र घुससमेत डिमान्डअनुसार दिन असक्षम हुँदा राजीनामा दिएको छ ।’