काठमाडौं– कञ्चनपुरकी १३ वर्षीया नाबालिका निर्मला पन्तका बलात्कारी–हत्यारा सार्वजनिक गर्न माग गर्दै केही हप्ताअघि सडक आन्दोलन चर्किरहेको थियो । त्यति नै बेला गृहमन्त्री रामबहादुर थापा ‘बादल’ लगायत राजनीतिक नेतृत्वबाट अपराधी पत्ता लगाउन दबाब बढिरहेको थियो । प्रहरी महानिरीक्षक खनालले जुक्ति निकाले १–२ जना पक्राउ गर्ने र नेतादेखि जनतासम्मलाई अल्झाउने ।

आईजीपी खनालको नक्कली जुक्तिको शिकार भए – कंचनपुरका प्रदीप रावल र विशाल चौधरी । प्रदीप रावललाई काठमाडौंबाट पक्राउ गरेपछि प्रहरीले कञ्चनपुरबाट विशाल चौधरीलाई पक्राउ गरेर काठमाडौं ल्यायो । आईजीपी खनाल स्वयं बयान लिन प्रत्यक्ष सक्रिय भए र दुवैले अपराध स्वीकारेको प्रचार गरियो । तर अन्ततः आईजीपी खनालको जुक्ति असफल भयो ।

निर्मला पन्तको हत्या प्रकरणमा फेरि पनि प्रहरी विवाद झेल्न बाध्य भएको छ । निर्मला हत्यामा संलग्न भनिएका प्रदीप रावल र विशाल चौधरीले प्रहरीले चरम यातना दिएका कारण आरोप स्वीकार्न बाध्य भएको खुलासा गरेका छन् ।

प्रहरी महानिरीक्षक सर्वेन्द्र खनाल स्वंयले बयान लिएका दुई युवकले प्रहरीको यातना दिएको विषय बाहिर ल्याएका हुन् । प्रहरीको नेतृत्वमा रहेका आईजीपी सर्वेन्द्र खनालको हिरासतमा रहेका शंकास्पद व्यक्तिमाथि सम्मानजनक र कानूनी व्यवहार गर्नुपर्नेमा गुण्डाशैलीमा अपराध स्वीकार्न धम्की दिएको आरोप लागेको छ ।

काठमाडौंबाट नियन्त्रणमा लिइएका प्रदीप र कञ्चनपुरबाट पक्राउ परेका विशाललाई प्रहरीले आरोपित पक्राउ परिसकेको र छिट्टै सार्वजनिक गरिने बताएको थियो । हिरासतबाट छुटिसकेका उनीहरूले निर्मलालाई कहिल्यै नदेखेको र नसुनेको बताउंदै आफूहरूमाथि ठूलो अन्याय भएको बताएका छन् ।

उपप्रधान तथा रक्षामन्त्री ईश्वर पोखरेलले निर्मलाका हत्यारा पक्राउ परिसकेको र चांडै सार्वजनिक हुने बताएपनि अन्ततः उनको भनाई गलत सावित भएको छ ।

पक्राउ परेका प्रदीपले भनेका छन्, ‘तिमीहरूकै संलग्नता रहेको हामीले थाहा पाएका छौं । विशालले हामी दुई जनाले गरेको भनेको छ । हामी तिमीहरूकै मुखबाट आरोप स्वीकार गरेको हेर्न चाहन्छौं । अरुको नाम तिमीलाई नै थाहा होला भनेर अपराध स्वीकार्न लगाए ।’

नेपाल प्रहरीको केन्द्रीय अनुसन्धान ब्यूरो (सीआईबी) मा राखेर चरम यातना दिएको प्रदीपले बताएका छन् । राजेश गिरी र सुन्दर नेपाली नामका दुई प्रहरीले आफूलाई तर्साएर आरोप स्वीकार गर्न लगाएको उनको भनाई छ । उनले भने, ‘राजेश गिरीले कान निमोठ्यो, कपाल समाएर तान्यो । पाइपले खुट्टामा हान्यो । काठको लौरोले हानेर १५ चोटी सिलिङ छुन लगायो ।’

उनले आईजीपी खनालकै अगाडि जबर्जस्ती आरोप स्वीकार गर्न लगाएको बताए । उनले भने, ‘आईजीपी आएर मेरो अगाडि ढुंगा पनि बोल्छ भाइ भन्यो । मैले पनि खै सर, मैले गरेकै छैन सर भने । अनि किन अघि बयान दिएको त भनेर आईजीपीले सोधे । त्यो त मलाई बयान नस्वीकार्दासम्म यातना दिए, त्यसैले स्वीकारे भनेर मैले भने । त्यसपछि आईजीपीले भाई तिमीले धेरै पिटाइ खान्छौं, हामीलाई थाहा भइसकेको छ भनेर धम्की दिए ।’

विशालले पनि हिरासतभित्र दिएको यातनाबारे भने, ‘मैले मेरो डीएनए मिले ३० वर्षको जेल हालिदिनु भनें । पछि उनीहरूले तलाई प्रदीपले फसाइ रहेको छ, कति जना थियौ भनेर सोधे । त्यहां धेरै यातना दिए । आंखामा पट्टि लगाएका थिए । उनीहरूले मलाई पुलिस बनाइदिन्छु भने । त्यहँं धेरै कुटे । आरोप स्वीकार गर्न लगाए ।’

निर्मला पन्तको हत्या प्रकरणमा जिल्ला प्रहरी कार्यालय कञ्चनपुरका तत्कालीन प्रमुख प्रमुख एसपी डिल्लीराज विष्ट र केन्द्रीय अनुसन्धान ब्यूरो (सीआईबी) का डीएसपी अंगुर जिसीले निर्दाेष दिलिपसिंह विष्टलाई फसाउन धेरै कोसिस गरेका थिए । नक्कली प्रमाण बनाउन दिलिपलाई फसाउन खोजिएको सार्वजनिक भएपछि जनआक्रोश बढ्यो र दुवै प्रहरी अधिकृत उल्टै फसे ।

पछिल्लो समय प्रदीप र विशाललाई फसाउने प्रकरणमा समेत निर्दाेषलाई फसाउन निरन्तरता देखिएको थियो । यो निरन्तरतामा संलग्न देखिएका छन् आईजीपी सर्वेन्द्र खनाल । प्रदीप र विशाललाई फसाउन नसकिएपछि फेरि अरु कसैलाई फसाउन नयां खेल रच्ने हुन् कि भन्ने आशंका सर्वसाधारणमा देखिएको छ ।