इस्लामाबाद–पाकिस्तानी प्रधानमन्त्री इमरान खानको शपथ समारोहमा पुगेका कांग्रेस नेता नवजोत सिंह सिद्धुले पाकिस्तानी सेनाका प्रमुखसंग अंकमाल गरेको तस्बिर सार्वजनिक भएपछि भारतमा त्यसको आलोचना भएको छ । पंजावमा मन्त्री समेत रहेका पूर्व क्रिकेटर सिद्धु इमरानको निमन्त्रणामा पाकिस्तान पुगेका हुन । कांग्रेस प्रवक्ता राशिद अल्वीले समेत उनको आलोचना गरेका छन् ।

सिद्धुले पाकिस्तानी प्रधानमन्त्रीलाई कस्मिरी साउल उपहार समेत दिएका छन् । उनले आफु एउटा राम्रो साथीको रुपमा सहभागी भन्दै आफ्नो सदभाव भ्रमण भएको स्पष्ट पारे ।

‘मलाई उनले सल्लाह लिएका भए म पाकिस्तान नजान सल्लाह दिन्थे,उनी साथीको हिसाबले शपथमा गएका हुन, तर साथीभन्दा देश ठुलो हुन्छ ।’ प्रवक्ता अल्वीले एक टिभि च्यानलमा भनेका छन् ।

उनले सीमामा भारतीय सेनाका जवानहरु मरिरहेका बेला सिद्धुले अंगालो मार्नुले गलत सन्देश जाने समेत बताएका छन् ।कांग्रेस प्रवक्ता अल्वीले उनलाई पाकिस्तान जान भारत सरकारले अनुमती दिनु नै गलत भएको बताए ।

आफ्ना साथी पूर्व क्रिकेटर खान प्रधानमन्त्री बन्ने पक्का भएपछि उनले पाकिस्तान जाने बताएका थिए । उनको पाकिस्तान भ्रमणको विषयलाई लिएर भारतमा सामाजिक संजालमा समेत निकै ठुलो आलोचना भएको थियो ।

इमरानले सिद्धुसहित केही भारतियलाई शपथ समारोहमा सहभागी हुन निम्तो दिएका थिए ।  उनको भ्रमणलाई लिएर अकाली दका नेता सुखबीर बादलले सिद्धु पाकिस्तानमै रहनुपर्ने बताएका थिए । उनले सिद्धु पाकिस्तानमै रह पंजाब र पुरै देशमा शान्ती हुने बताएका थिए ।