काठमाण्डु-जय ट्रफी पुरुष कप क्रिकेट आइतवारदेखि शुरु हुँदैछ । प्रतियोगितामा दुई विभागीय टोली नेपाल पुलिस क्लब र त्रिभुवन आर्मी तथा बागमती र मधेस प्रदेशगरी चार टोली छन् । नेपाल क्रिकेट संघ (क्यान) को आयोजनामा हुन लागेको प्रतियोगितामा आइतवार दुई वटा खेल हुँदैछन् ।

पहिलो खेलमा पुलिस क्लब र त्रिभुवन आर्मी तथा दोस्रो खेलमा बागमती प्रदेश र मधेस प्रदेशले खेल्दैछन् । पुलिस र आर्मीको खेल विरगञ्जमा तथा बागमती र मधेसको खेल जनकपुरमा हुँदैछ ।

सिङ्गल राउण्ड रोविनका आधारमा लिग चरणका खेल हुने प्रतियोगितामा शीर्ष दुई टोली फाइनलमा पुग्नेछन् ।

क्यानका अनुसार अरू खेल दुई दिवसीय र फाइनल खेल तीन दिवसीय फम्र्याटमा हुनेछ । क्यानका पूर्वअध्यक्ष जयकुमार शाहको नामबाट यो प्रतियोगिता आयोजना गरिएको हो । यो प्रतियोगितामा गएको वर्ष भएको प्रधानमन्त्री कप राष्ट्रिय क्रिकेटमा शीर्ष चारमा रहेका टोली सहभागी छन् ।

राष्ट्रिय टोलीका कप्तान रोहित पौडेलको कप्तानीमा रहेको एपीएफ शीर्ष चारमा नपर्दा उनीसहित आसिफ शेख, लोकेश बम, सन्दिप जोरालगायतका खेलाडीले खेल्ने छैनन् । नेपाल पुलिसका कप्तान दीपेन्द्रसिंह ऐरी युएईमा हुने अन्तर्राष्ट्रिय लिग टी–२० मा सहभागी हुने भएकाले उनले पनि यो प्रतियोगिता गुमाउनेछन् ।